Mońǵolııa astanasynda 23 jeltoqsannan bastap qatań karantın engiziledi

ULANBATYR. Montsame-QazAqparat - Mońǵolııa úkimeti el astanasynda 23 jeltoqsannan bastap 2021 jyldyń 6 qańtaryna deıin jappaı qatań karantın jarııalady, dep habarlaıdy QazAqparat Montsame agenttigine silteme jasap.

Mońǵolııa vıtse-premeri ıA. Sodbaatardyń aıtýynsha, mundaı sheshim Densaýlyq saqtaý mınıstrligi men Infektsııalyq aýrýlardy ulttyq zertteý ortalyǵy mamandarynyń, mońǵolııalyq ǵalymdar men zertteýshilerdiń usynys-pikirine súıene otyryp qabyldanǵan.

Densaýmın jáne Infektsııalyq aýrýlardy ulttyq zertteý ortalyǵy jaýapty mamandarynyń sózine sensek, mońǵol astanasynda ınfektsııanyń jańa klasteri paıda bolǵan.

Ol Ulanbatyrdyń Baıanzýrh aýdanynda tirkelgen.

Aıta keteıik, Mońǵolııada 993 adam koronavırýs juqtyrǵan. 509 patsıent indetten jazylyp ketti. COVID-19 vırýsynan qaıtys bolǵandar joq.

Mońǵolııa úkimeti azamattardy múmkindiginshe qoǵamdyq oryndarǵa barmaı, qaýipsizdik sharalaryn saqtaýǵa jáne medıtsınalyq masqa kııýge shaqyrady.