Mońǵolııa alǵash ret Dúnıejúzilik jylqy kúnin atap ótti
ASTANA. KAZINFORM — Mońǵolııada eldiń bastamasymen Birikken Ulttar Uıymy Bas Assambleıasy bekitken Dúnıejúzilik jylqy kúni alǵash ret resmı túrde atalyp ótti, dep habarlaıdy MONTsAME.
Saltanatty shara 13 shildede Húı doloon hýdag jerinde ótip, oǵan Mońǵolııa Prezıdenti Ýhnaagıın Húrelsúh qatysty.
Memleket basshysy óz sózinde mońǵol jylqysy adamzat tarıhynda, kóshpeli órkenıettiń qalyptasýynda jáne Shyǵys pen Batys arasyndaǵy baılanysty nyǵaıtýda mańyzdy ról atqarǵanyn atap ótti. Sondaı-aq ol jylqynyń Mońǵolııanyń ulttyq murasynyń ajyramas bóligi ekenin aıtty.
Prezıdenttiń málimetinshe, búginde álemde 60 mıllıonnan astam jylqy bar, onyń 5 mıllıonnan astamy Mońǵolııada ósiriledi. El jylqy sany boıynsha álemde tórtinshi, al jan basyna shaqqandaǵy jylqy sany boıynsha birinshi orynda tur.
Ýhnaagıın Húrelsúh 2025 jyly jylqy murasyn saqtaý, zertteý jáne nasıhattaý maqsatynda Dúnıejúzilik jylqy kúnin belgileý bastamasyn kótergenin eske saldy. Keıin bul usynysty BUU Bas Assambleıasy qoldap, mereke endi jyl saıyn ulttyq Naadam merekesi aıasynda resmı túrde atap ótiletin boldy.
Dúnıejúzilik jylqy kúni aıasynda alǵash ret halyqaralyq at jarystary uıymdastyrylyp, eldiń barlyq óńirinen kelgen shabandozdardyń qatysýymen saltanatty sherý ótti.
Buǵan deıin Mońǵolııada biregeı túrki eskertkishterin qorǵaýǵa arnalǵan qorshaýlar ashylǵany habarlanǵan bolatyn.
Aıta ketelik Mońǵolııa Dúnıejúzilik jylqy kúnin alǵash ret halyqaralyq deńgeıde ótkizetini týraly jazǵan edik.
