Mońǵol ımperııasy kezindegi monetalardy AQSh-qa jóneltpek bolǵan

ALMATY. QazAqparat - Almaty qalasy boıynsha Memlekettik kirister departamenti «Jetisý» keden beketiniń mamandary Almaty qalasy áýejaıyndaǵy halyqaralyq poshta jóneltilimderin baqylaý ýchaskesinde Qazaqstannan AQSh-qa kóne monetalardy zańsyz áketýge jol bermedi, dep habarlaıdy QazAqparat.

«Qujattarǵa arnalǵan qaptama qapshyǵynyń syrtyna monetalardy jasyrý faktisin keden qyzmetkerleri qondyrǵynyń rentgenografııasyn paıdalanyp, skanerleý barysynda anyqtady. Bul monetalar V-XIII ǵasyrlar aralyǵynda Orta Azııa aýmaǵynda jasalǵan jáne tarıhı qundylyqqa ıe», - dep jazdy Memlekettik kirister komıtetinen.

Departament basshysynyń orynbasary Dáýren Mustafınniń aıtýynsha, tabylǵan zattar Qazaqstan Respýblıkasynyń zańnamasyna sáıkes elden áketý kezinde mindetti deklaratsııalaýǵa jatatyn jáne ýákiletti organnyń ruqsaty bolǵan jaǵdaıda ǵana múmkin bolatyn mádenı-tarıhı qundylyqtar sanatyna jatady.

Qazirgi ýaqytta anyqtalǵan fakt boıynsha alynǵan zattar men materıaldar sarapshylarǵa berildi, olar qorytyndydan keıin monetalardy áketýge áreket jasaǵan adamǵa qatysty tıisti protsestik sheshim qabyldaıtyn bolady.

Aıta ketý kerek, sońǵy ýaqytta tyıym salynǵan taýarlardy kontrabandalyq jolmen ákelý úshin poshta jóneltilimderiniń arnasy kóbirek qoldanylýda.

Tek 2022 jyly Almaty qalasynyń áýejaıynda aınalymǵa tyıym salynǵan taýarlardy, onyń ishinde esirtki men psıhotroptyq zattardy, qarý-jaraq pen oq-dárilerdi kedendik shekara arqyly ótkizýdiń ondaǵan jaǵdaılary toqtatyldy.

Foto: kgd.gov.kz