Mońǵol halqy Ulttyq merekesin tolyq apta boıy toılaıdy

ASTANA. KAZINFORM — Mońǵolııada bıyl Ulttyq mereke «Naadam» 10–17 shilde aralyǵynda atap ótiledi, dep habarlaıdy Montsame.

4 maýsym kúni ótken Úkimet otyrysynda Mońǵolııanyń Ulttyq merekesi — «Naadamdy» atap ótýge baılanysty sheshim qabyldandy.

2025 jyly resmı mereke bolyp sanalatyn 12 jáne 13 shilde kúnderi senbi jáne jeksenbige sáıkes kelgendikten, olar sársenbi men beısenbige — 16 jáne 17 shildege aýystyryldy. Osylaısha, Naadamǵa arnalǵan demalys kúnderi 10 shildede bastalyp, segiz kúnge sozylady.

Bul sheshim azamattardyń usynystary men ótinishterine saı qabyldandy. Onyń maqsaty — merekeni keń kólemde atap ótýge múmkindik berý, ishki týrızmdi qoldaý jáne jumys pen jeke ómir arasyndaǵy tepe-teńdikti saqtaý.

Aıta keteıik, Naadam — Mońǵolııadaǵy eń iri ári mańyzdy ulttyq mereke. Onyń ataýy «oıyn-saýyq» nemese «oıyndar» degen maǵyna beredi. Bul mereke ejelden beri mońǵol halqynyń táýelsizdigi men birliginiń sımvoly retinde toılanyp keledi.

Buǵan deıin Mońǵolııada alǵash ret «Altyn qaıshy — 2025» atty qoı qyrqý boıynsha halyqaralyq baıqaý jáne «Sút festıvali — 2025» festıvali ótetini belgili boldy.