Mońǵol ánshisi Sarantýıaa Qazaqstanda jeke kontsert beredi
ASTANA. QazAqparat - Mońǵolııanyń eńbek sińirgen ánshisi jáne «XX ǵasyrdyń úzdik ánshisi ataǵynyń» ıegeri Batmónhıın Sarantýıaa Qazaqstanda jeke kontsert beredi, dep habarlaıdy MONTsAME.
«Men baqyttymyn» degen atpen qoıylatyn estrada juldyzynyń jeke kontserti 12 mamyrda Almaty qalasyndaǵy «Alataý» dástúrli óner teatrynda ótedi.
Bul týraly ánshiniń prodıýserleri S.Tıka men M.Nurbaqyt habarlady. Ánshiniń bul keshi - qazaq kórermenderine arnalǵan ekinshi kontsert. Alǵash ret mońǵol ánshisi 2011 jyly Astana men Almaty qalalarynda gostroldik saparmen kelgen bolatyn. Bul joly ol óziniń «Rendom» tobymen birge óner kórsetedi.
Eske sala kelsek, mońǵol ánshisi Batmónhıın Sarantýıaa 1970 jyly 20 sáýirde Ulanbatyr qalasynda dúnıege kelgen. 80-jyldardyń sońynan beri ol eldiń estrada salasynda jetekshi oryndarda. B.Sarantýıaa - «Azııa daýsy» baıqaýynyń gran-prı ıegeri, ol mońǵol, orys jáne aǵylshyn tilderinde án shyrqaıdy.
