Monako knıazi Alber II Palestına memleketin moıyndaǵanyn jarııalady

NЬıÝ-IORK. KAZINFORM — Monako memleketi resmı túrde Palestına Memleketin moıyndaǵanyn el knıazi Alber II málimdedi. Bul týraly Anadoly jazdy.

BUU qoldaýymen, Frantsııa men Saýd Arabııasynyń bastamasymen ótken palestın máselesin sheshý jáne eki memleket prıntsıpin júzege asyrýǵa arnalǵan joǵary deńgeıli halyqaralyq konferentsııada sóılegen Alber II Monakonyń ózgermeıtin ustanymyn atap kórsetti.

Ol Monako basynan beri Izraıldiń tanylǵan shekaralaryndaǵy qaýipsiz ómir súrý quqyǵyn, sondaı-aq palestın halqyna egemen ári demokratııalyq memleket qurý quqyǵyn turaqty túrde qoldap kele jatqanyn aıtty.

— Búgin biz Izraıldiń bar bolýyn nyq qoldaıtynymyzdy qaıta rastaǵymyz keledi jáne sonymen birge halyqaralyq quqyq aıasynda Palestınany memleket retinde moıyndaımyz. Mine, dál osyny men sizderdiń aldynda jarııalap otyrmyn, — dedi knıaz.

Alber II turaqty sheshimge, ıaǵnı negizgi quqyqtardy qurmetteýge negizdelgen kelisimge jetý burynǵydan da ózekti ári qajetti ekenin atap ótti.

Ol beıbitshilik tek úmit bolyp qala bermeýi tıis ekenine senim bildirdi.

Knıaz eki memleket sheshimin uzaq merzimdi turaqtylyqqa aparar jol retinde berik qoldaı beretinin málimdedi.

— Beıbitshilik jarlyqpen júzege aspaıdy — ol jalpy erik-jigerge negizdeledi, — dep túıindedi Alber II.

Monako knıazdigi Jerorta teńizi jaǵalaýynda, Batys Eýropada ornalasqan jáne Vatıkannan keıin álemdegi eń kishkentaı táýelsiz memleketterdiń biri bolyp esepteledi.

Osyǵan deıin Nıý-Iork qalasynda Qasym-Jomart Toqaev Monako Knıazi ІІ Albermen kezdesý ótkizgenin jazǵanbyz.

Osy ýaqytqa deıin Frantsııa, Ulybrıtanııa, Portýgalııa, Aýstralııa jáne Kanada — jýyrda Palestına memleketin moıyndap, «eki halyqqa — eki memleket» sheshimin qoldaǵan Batys elderiniń qataryna endi.

Sonymen qatar Túrkııa Prezıdenti Rejep Taıyp Erdoǵan BUU Bas Assambleıasynyń 80-sessııasynda palestına-ızraıl qaqtyǵysy máselesin kóterdi. Erdoǵan álemdi Palestınany moıyndaýǵa shaqyrdy.

Aıta keteıik, Palestına halyqaralyq qaýymdastyqty Nıý-Iork deklaratsııasyn qoldaýǵa shaqyrdy.