"Mona Lıza" Aıǵa attandy
ASTANA. 26 qańtar. QazAqparat - NASA mamandary lazerlik sáýle arqyly eki ǵalamsharlyq deneler arasynda derekter jiberip, keremet tájirıbe jasady.
SPACE.com-nyń habarlaýynsha, derek retinde Leonardo da Vınchıdiń «Mona Lıza» kartınasy alynǵan.
Merılend shatatynan jiberilgen lazerlik belgi 384 myń shaqyrym qashyqtyqtaǵy Lunar Reconnaissance Orbiter (LRO) dep atalatyn Aıdyń jasandy serigine sátti jetken. Bul jasandy serik aı orbıtasynda 2009 jyldan beri ushyp júr.
Bul tájirıbege LRO-da lazerlik qabyldaǵysh bar bolǵandyqtan tańdalyp alynypty. NASA onyń qozǵalysyn lazerler arqyly qadaǵalap otyratyn kórinedi. Amerıkandyqtar jasandy serik mejeli jerge jetken kezde «Mona Lızany» jibergen. Al kóp keshikpeı beıneni radıo arqyly qabyldaǵan jasandy serik ózi qabyldaǵan derekterdi qaıyra jibergen. Sýretti jiberý jyldamdyǵy shamamen sekýndyna 300 bıt bolǵan.
