Momyshulynyń kúrteshesi kentaýlyq Jeńis aqsaqaldyń úıindegi murajaıda tur
Qarııa shaǵyn ǵana bólmege 1000 jýyq eksponant jınapty. Olardyń ishinde qol dıirmen, kúmis quman, B.Momyshuly kıgen kúrteshe bar
Jeńis Berikqara 1945 jyly 9 mamyr kúni dúnıege kelgen. Uly Jeńis kúniniń qarsańynda týǵandyqtan ata-anasy esimin Jeńis dep qoıypty. Qazirgi kezde qarııa 77 jasqa tolyp otyr.
Aqsaqaldyń mýzeıge qoıǵan qol dıirmeni áli kúnge deıin jumys istep tur. Oraza kezinde taryny tartyp alypty. Odan bólek, ózi jazǵan «Amanat», «Salaýatker», «Qassaq» atty úsh kitaby men jınaqqa áńgimeleri men óleńderin ornalastyrǵan. Tórde dombyra ilýli tur. Fotosýretter men ózge de zattar sórelerden oryn alǵan. Al, erterekte qoldanylǵan patıpondy da iske qosýǵa bolady.
Jalpy Jeńis Qoshanulyn jerlesteri «Salaýatker» dep tanıdy. Ózi de árdaıym salaýatty ómir saltyn nasıhattap júretin aqsaqal jas kezinen kúndelikti beltemirge tartylyp, jattyǵýlar jasaıtyn. Tipti shpagatqa otyryp, shekesimen jańǵaq shaǵatyn. Degenmen, qazirgi kezde qarttyq oqys qımyl jasaýǵa kóp múmkindik bermeıdi eken.
«Eki kózim kórmeı qaldy. Sondyqtan burynǵydaı sportpen belsendi shuǵyldana almaımyn. Jas kúnimde keýdeme tas qoıyp, balǵamen urǵyzyp syndyrtatynmyn. Qazir oǵam shamam kelmeıdi. Qartaıdym. Biraq jattyǵýlardy úzbeımin. Tańerteń jáne keshkisin aýlada sportpen shyǵyldanamyn. Balamdy ertip qala kóshelerinde jaıaý júrip kelemin. Muzdaı sýǵa túsemin. Baspen turyp, aıaqtarymdy shynyqtyramyn. Munyń bári densaýlyqqa óte paıdaly», - deıdi qarııa.
Salaýatker budan bólek, qarapaıym qurylys materıaldarynan túrli kompozıtsııalar jasaýmen aınalysqan. Máselen, Qazaqstan EQYU-ǵa tóraǵalyq etken jyldary eskertkish balbaltasty qurastyrsa, Uly Jeńistiń 65 jyldyǵy qarsańynda maıdangerlerdiń erligin beıneleıtin kompozıtsııa jasapty. Al zymyran maketiniń ishinen gúl ósirgen kompozıtsııasy beıbitshiliktiń belgisin kórsetedi. Keıinnen onyń da bárin qaladaǵy mádenıet saraıyna tabystaǵan.
