«Móldir bulaq» aktsııasy: Jambyl oblysynda aýyl turǵyndary bulaq kózderin ashty
ASTANA. KAZINFORM — Jambyl oblysy Baızaq aýdanyna qarasty Jetibaı aýylynyń turǵyndary «Móldir bulaq» ekologııalyq aktsııasyna qatysty. Jergilikti aqsaqaldardyń bastamasymen aýyl turǵyndary jaqyn mańdaǵy bulaq kózderiniń aýmaǵyn tazalap, abattandyrý jumystaryn júrgizdi. Bul týraly Sý resýrstary jáne ırrıgatsııa mınıstrligi málim etti.
Aktsııaǵa Sý resýrstary jáne ırrıgatsııa mınıstrliginiń bastamasymen qurylǵan «Bolashaqtyń qaınary» atty sý salasyndaǵy alǵashqy eriktiler qozǵalysyna qabyldanǵan jergilikti mektep oqýshylary da qosyldy. Іs-shara kezinde bulaq kózderiniń tabıǵı arnasy ashylyp, qalpyna keltirildi, sondaı-aq aýmaq qoqystan tazartylyp, kóshet otyrǵyzyldy.
— Aýyl turǵyndary «Móldir bulaq» aktsııasy týraly jańalyqtar men áleýmettik jelilerden bildi. Osyny estigen soń, jastarǵa úlgi kórsetý úshin belsendi qatysýǵa sheshim qabyldadyq. Bizdiń aýyldyń ózi bulaqtardyń ortasynda ornalasqan, sondyqtan sý kózderin saqtaý biz úshin erekshe mańyzdy. Bul aktsııanyń tárbıelik máni óte joǵary. Biz osy arqyly jastarǵa tabıǵatty qorǵaý, ekologııalyq mádenıetti qalyptastyrýdy úıretemiz. Bul jer aldaǵy ýaqytta aýyldyń kórikti ortalyqtarynyń birine aınalady dep senemiz, — dedi Jetibaı aýylynyń aqsaqaldar keńesiniń tóraǵasy Marat Qoshqarbaev.
Jetibaı aýylynyń aqsaqaly Qalmahan Bekmaǵambetov qazaq halqy ejelden-aq sý kózin taza ustaýdy, ony lastamaýdy dástúrge aınaldyrǵanyn aıtty.
— Bul — ata-babadan qalǵan amanat. Biz — aǵa býyn, sol dástúrdi keıingi urpaqqa jetkizýimiz kerek. Bul tek ekologııa emes, tárbıe quraly. Tabıǵatty saqtaý — urpaqqa qaldyratyn eń úlken mura,— dedi qarııa.
Eske salaıyq, Memleket basshysynyń «Taza Qazaqstan» bastamasy aıasynda Sý resýrstary jáne ırrıgatsııa mınıstrligi «Móldir bulaq» ekologııalyq aktsııasyn uıymdastyrǵan bolatyn. Bıyl naýryz aıynda ótken alǵashqy kezeń Almaty, Jambyl, Qyzylorda, Túrkistan, Jetisý oblystaryn jáne Shymkent qalasyn qamtydy.
