«Móldir bulaq» ekoaktsııasy: Eldegi jaǵalaýlardan 300 tonnaǵa jýyq qoqys jınaldy
ASTANA. KAZINFORM — QR Sý resýrstary jáne ırrıgatsııa mınıstrligi uıymdastyrǵan «Móldir bulaq» ekologııalyq aktsııasy aıasynda elimizdegi jaǵalaýlardan 300 tonnaǵa jýyq qoqys jınaldy. Bul týraly vedomstvonyń resmı saıtynda jarııalandy.
Sý resýrstary jáne ırrıgatsııa mınıstrligi men oǵan qarasty uıymdardyń mamandary «Móldir bulaq» atty keń kólemdi ekologııalyq bastamany qolǵa aldy. Bul is-shara «Taza Qazaqstan» respýblıkalyq ekologııalyq aktsııasy aıasynda júzege asyp otyr.
Maqsaty — bulaqtar, ózender men sý qoımalarynyń jaǵasyn tazalap, abattandyrý, sondaı-aq turǵyndar arasynda sý resýrstaryna uqypty qaraý mádenıetin qalyptastyrý.
Elimiz boıynsha jaǵalaý aýmaqtaryn tazalaý jumystaryna 4000-nan astam adam qatysty.
Aýqymdy senbiliktiń qorytyndysy boıynsha elimizdegi jaǵalaý aýmaqtarynan 300 tonnaǵa jýyq qoqys jınaldy.
— «Taza Qazaqstan» aktsııasy aıasynda mınıstrlik uıymdastyrǵan respýblıkalyq senbilik elimizdiń sý nysandaryn lastanýdan qorǵaýǵa ǵana baǵyttalmaǵan. Sonymen qatar bul shara qoǵamda tabıǵı sý resýrstaryna uqypty qaraý mádenıetin damytýǵa arnalǵan. Mundaı aýqymdaǵy jaǵalaýdy tazalaý jumysy elimizde alǵash ret ótkizilip otyr. Aldaǵy ýaqytta mundaı senbilikterdi turaqty túrde ótkizý josparlanyp otyr, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin «Taza Qazaqstan» aktsııasy aıasynda Sý resýrstary jáne ırrıgatsııa mınıstrligi Oqý-aǵartý mınıstrliginiń qoldaýymen mektepterde sý únemdeý taqyrybynda ashyq sabaqtar ótkizgen bolatyn. Oǵan shamamen 2 mln oqýshy qatysty.
Aıta keteıik, Qyzylordada Dúnıejúzilik tazalyq kúnine oraı densaýlyq jáne demalys saıabaǵynda senbilik ótti.