«Móldir bulaq»: BQO-da respýblıkalyq tazalyq aktsııasy ótti
ORAL. KAZINFORM – Tasqala aýdanynda QR Sý resýrstary jáne ırrıgatsııa mınıstrliginiń bastamasymen jáne oblys ákimdiginiń qoldaýymen «Taza Qazaqstan» tujyrymdamasy aıasynda «Móldir bulaq» respýblıkalyq aktsııasynyń ekinshi kezeńi ótkizildi.
Oǵan vıtse-mınıstr Jandos Sálimov, oblys ákimi apparatynyń basshysy Nurdildá Oraz, «Qazsýshar» kásiporny men Jaıyq-Kaspıı basseındik sý ınspektsııasynyń mamandary, aýdandyq bólim-mekeme qyzmetkerleri, úkimettik emes uıym músheleri, «Jasyl el» eńbek jasaǵy men erikti jastar qatysty.
Ekologııalyq aktsııany ashqan Nurdildá Oraz aımaq basshysynyń sálemin jetkizip, Prezıdent tapsyrmasyna sáıkes «Taza Qazaqstan» tujyrymdamasy aıasynda atqarylǵan naqty isterge toqtaldy.
— Bıyl oblystyq sanıtarlyq-ekologııalyq aılyq aıasynda uıymdastyrylǵan «Taza ólke», «Móldir bulaq», «Jasyl bolashaq» sııaqty aktsııalarǵa 85 myńnan astam adam qatysyp, 17 myń gektar aýmaq tazartyldy, sondaı-aq 36 myńnan astam aǵash otyrǵyzyldy. Búgingi basqosý — kezekti ekologııalyq shara ǵana emes, bul — keleshek urpaq aldyndaǵy jaýapkershilikti tereń sezinýdiń jáne atamekenge degen shynaıy súıispenshiliktiń aıqyn kórinisi, — dedi ol.
Aımaqta sý salasyn damytý jáne gıdroqurylymdardy jańǵyrtý boıynsha aýqymdy jumystar júrgizilip jatyr. Bıyl Tasqala aýylynda Derkól ózeniniń arnasy keńeıtilip, túbi tereńdetilýde. Aýdan úshin strategııalyq mańyzy bar Jaıyqbaı arnasyn qaıta jańǵyrtý jumystary da qolǵa alyndy.
QR Sý resýrstary jáne ırrıgatsııa vıtse-mınıstri Jandos Sálimov berekeli bastamaǵa birkisideı atsalysqan azamattarǵa rızashylyǵyn bildirdi. Eńbek ardageri Baqtyǵul Tasmaǵambetov Tasqalanyń baı tabıǵatyn saqtaý men ony urpaqqa amanat etýdiń mán-mańyzyn aıtsa, aqsaqal Jumageldi Úmbetálıev ıgi iske aq batasyn berdi.
Aktsııa aıasynda 130-dan astam adam Tasqala aýyly mańyndaǵy shaǵyn bulaqty kóń-qoqystan tazartyp, aǵashtardyń túbin áktedi. Qýraǵan tal-terekterdi kesip, aýmaqty aramshópterden aryltty.
Aıta keteıik, jalpy uzyndyǵy 176 shaqyrym bolatyn Derkól ózeni osyndaı jerasty bulaqtardan da nár alady. Eshkitaýdan bastaý alyp, Shaǵanǵa baryp quıady.
