«Móldir bulaq»: Jambyldyqtar bulaq kózin qoqystan tazartty
ASTANA. KAZINFORM — Jambyl oblysy Jýaly aýdanyna qarasty Alataý aýylynyń turǵyndary «Móldir bulaq» ekologııalyq aktsııasyna qatysty, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Aýyl turǵyndary óz bastamalarymen Shońqara bulaǵynyń kózin ashyp, aınalasyn tazalap, abattandyrý jumystaryn júrgizdi. Іs-sharany aýyl aqsaqaldary uıymdastyryp, olardyń bastamasyn jergilikti jastar qoldady.
Іs-sharaǵa qatysýshylar qazaqstandyqtardy aktsııaǵa qosylyp, eldegi sý kózderin qoqys pen lastanýdan qorǵaýǵa óz úlesterin qosýǵa shaqyrdy.
— Aýyl turǵyndary, onyń ishinde oqýshylar men aǵa býyn ókilderi «Móldir bulaq» aktsııasy men Prezıdenttiń «Taza Qazaqstan» bastamasyn qoldaý maqsatynda bulaq kózin tazalaýǵa shyqtyq. Basqa aýyldar men aýdandar da bizden úlgi alsyn dep bul is-sharany jyl saıyn ótkizip kelemiz. Sýdy baǵalap, ony lastamaı, qurmetpen qaraý qajet. Sondyqtan aktsııanyń tárbıelik máni zor. Mundaı is-sharalardy keleshek urpaq aldaǵy ýaqytta da jalǵastyryp, jaqsy dástúrge aınaldyrady dep senemin. Bulaqtyń kózi ashylsa, halyqqa tıgizer paıdasy zor, — dedi Alataý aýylynyń turǵyny Altynbek Mamytqulov.
Shońqara bulaǵy — jergilikti turǵyndar úshin mańyzdy sý kózi. Ol egistik alqaptaryn sýarýǵa jáne basqa da sharýashylyq qajettilikterge paıdalanylady.
Eske salaıyq, «Móldir bulaq» ekologııalyq aktsııasyn Sý resýrstary jáne ırrıgatsııa mınıstrligi Memleket basshysynyń «Taza Qazaqstan» bastamasy aıasynda uıymdastyrdy.
Bıyl naýryz aıynda aktsııanyń alǵashqy kezeńi ótip, oǵan Almaty, Jambyl, Qyzylorda, Túrkistan, Jetisý oblystary jáne Shymkent qalasy qatysty.
Budan buryn Prezıdenttiń Іs basqarmasy «Móldir bulaq» aktsııasyna qatysqanyn jazǵanbyz.
