«Móldir bulaq» aktsııasy aıasynda 94 bulaq pen 62 sý nysany tazartyldy

Memleket basshysynyń «Taza Qazaqstan» bastamasy aıasynda uıymdastyrylǵan «Móldir bulaq» respýblıkalyq ekologııalyq aktsııasynyń eki kezeńi sheńberinde elimizdiń barlyq óńirinde bulaqtar men sý aıdyndarynyń jaǵalaýlaryn tazalaý jáne abattandyrý jumystary júrgizildi.

Aktsııanyń alǵashqy kezeńi bıyl 23 naýryzda, ekinshi kezeńi 11 shildede ótti. Nátıjesinde Almaty, Aqmola, Aqtóbe, Atyraý, Shyǵys Qazaqstan, Jambyl, Batys Qazaqstan, Qaraǵandy, Qostanaı, Qyzylorda, Mańǵystaý, Pavlodar, Soltústik Qazaqstan, Túrkistan, Abaı, Jetisý, Ulytaý oblystary men Shymkent qalasynda 94 bulaq pen 62 sý nysany tazartyldy. Aktsııaǵa jalpy 23,7 myńnan astam adam, onyń ishinde 3 myńǵa jýyq erikti qatysty.

«Móldir bulaq» aktsııasy aıasynda sý salasyndaǵy alǵashqy eriktiler qozǵalysy — «Bolashaqtyń qaınary» quryldy. Onyń maqsaty — jastar arasynda ekologııalyq mádenıetti qalyptastyryp, damytý. Qozǵalystyń alǵashqy quramyna Taraz qalasyndaǵy Qazaq ulttyq sý sharýashylyǵy jáne ırrıgatsııa ýnıversıtetiniń stýdentteri endi. Qazirgi ýaqytta «Bolashaqtyń qaınary» eriktiler qozǵalysy Qazaqstannyń ózge óńirlerinde de jumys istep keledi.

Eriktiler qozǵalysynyń músheleri qosymsha taǵy 5 bulaq pen 6 sý aıdynynyń jaǵalaýyn tazartty. Іs-sharalarǵa negizinen jastardan quralǵan 3 myńnan astam adam qatysty.

«Móldir bulaq» aktsııasy azamattardyń keń qoldaýyna ıe boldy. Sáýir aıynda Qostanaı oblysynda kolledjderdiń eriktileri men oqytýshylary ózender men sý aıdyndarynyń jaǵalaýyn tazalaý jumystaryn uıymdastyrdy. Ásirese Tobyl ózeniniń jaǵalaýyn, sondaı-aq sý nysandaryna irgeles ornalasqan jaǵalaýlar men saıabaq aýmaqtaryn tazalaýǵa erekshe nazar aýdaryldy.

Bıyl mamyr aıynda Aqtóbe sý qoımasy aýmaǵynda jaǵalaýdy turmystyq qaldyqtardan tazartý boıynsha ekologııalyq aktsııa ótti. Onyń nátıjesinde 2 tonnadan astam qoqys shyǵaryldy. Sonymen qatar Balqash-Alakól basseındik ınspektsııasy «Alma-Arasan» shatqalyndaǵy bulaq aýmaǵyn qoqystan tazartý jumystaryn uıymdastyrdy. Mamyr aıynda Qostanaı oblysyndaǵy Tobyl ózeniniń jaǵalaýyn tazalaý sharalary da ótkizilip, nátıjesinde 3 tonna qoqys jınaldy.

— Qysqa ýaqyt ishinde «Móldir bulaq» aktsııasy azamattardyń ekologııalyq mádenıetin qalyptastyrýǵa eleýli úles qosyp, bulaqtardyń tabıǵat úshin mańyzyn keńinen nasıhattaı aldy. Elimizdiń túkpir-túkpirindegi qazaqstandyqtar bul bastamany belsendi qoldap, óz kúshterimen bulaqtardyń kózin ashý jáne qalpyna keltirý, qoqys tazalaý, kóshet otyrǵyzý jumystaryn uıymdastyra bastady. Aktsııada sý resýrstaryn saqtaýǵa beıjaı qaramaıtyn jastarǵa erekshe mán berildi. Sondaı-aq mundaı is-sharalardyń bastamashysy ári uıymdastyrýshysy bolyp júrgen aǵa býyn ókilderiniń eńbegin de erekshe atap ótken jón, — dedi Sý resýrstary jáne ırrıgatsııa vıtse-mınıstri Talǵat Momyshev.

Aıta ketelik «Móldir bulaq»: Astanada 3 shaqyrym aýmaq tazartylyp, qoqys jınaldy.