Moldovanyń EO-ǵa kirý týraly kelissózderi 2027 jylǵa deıin aıaqtalýy múmkin

ASTANA. KAZINFORM — Moldova Prezıdenti Maııa Sandý eldiń Eýropalyq Odaqqa kirý týraly kelissózderi 2027 jyldyń sońyna deıin aıaqtalýy múmkin ekenin málimdedi, dep jazady AZERTADJ.

Agenttik TV8-ge silteme jasaı otyryp habarlaǵandaı, Moldovanyń memleket basshysy kelissózder aıaqtalǵannan keıin 2028 jyly EO-nyń barlyq múshe memleketteri kelisimdi ratıfıkatsııalaý kezeńin bastaıtynyn atap ótti. Dál osy kezde Moldovanyń Eýropa qoǵamdastyǵyna tolyqqandy múshe bolatyn ýaqyty naqty sheshiledi.

— Meniń oıymsha, kelissózderdi aıaqtaýdyń naqty merzimi — 2027 jyldyń sońy. Osydan keıin, 2028 jyly barlyq el bizdiń kelisimimizdi qoldaý jáne ratıfıkatsııalaý boıynsha óz ustanymdaryn bildiretin kezeń bastalady, — dedi Sandý.

Moldova prezıdentiniń aıtýynsha, eýropalyq sheneýnikter Kıshınevtegi reformalardyń qarqynyn joǵary baǵalaıdy. Atap aıtqanda, keńeıtý máseleleri boıynsha eýrokomıssar Marta Kos jaqynda Moldovaǵa sapary kezinde eldiń eýroıntegratsııanyń barlyq baǵyty boıynsha basqa kandıdat elderge qaraǵanda tezirek ilgerilep jatqanyn aıtty.

Sandý eldiń bolashaǵy aldaǵy parlamenttik saılaý nátıjelerine tikeleı baılanysty dep sanaıdy.

— Másele «biz parlamenttik saılaýda qandaı tańdaý jasaımyz» degen saýal tóńireginde bolyp tur, óıtkeni bári parlamenttiń jáne parlamenttik kópshiliktiń qoldaýyna baılanysty, — dep qosty Moldova kóshbasshysy.

Osydan buryn moldovalyq depýtattar parlament saılaýyn qyrkúıekke belgileýi múmkin ekeni aıtyldy.