Moldovan qyzy: Jahandaný zamanynda qazaqy tárbıe umytylmasa dep tileımin

NUR-SULTAN. QazAqparat - Jahandaný zamanynda qazaqy tárbıe umytylmasa degen tilegim bar. Bul tilekti búgin Qazaqstan halqy Assambleıasynyń XXVII sessııasynda Qostanaı oblystyq fılarmonııasynyń baspasóz hatshysy Alla Chechetkına bildirdi, dep habarlaıdy QazAqparat tilshisi.

«Men Qostanaı oblysynyń Amangeldi aýdany Tasty aýylynyń týmasymyn. Ultym moldavan. Aty-jónim - Alla Chechetkına. Ózim qazaqtyń salt-dástúri men mádenıetinen sýsyndap ósken balamyn. Negizi, qazaq tilin bilý úshin, men sııaqty, kórshi Kúmis ájeniń myjymasyn jep ósý kerek. Al sizder, myjymanyń qandaı as ekenin bilesizder me? Qoldyń sary maıy qosylyp, myjylǵan ystyq taba nannyń dámi áli kúnge tańdaıymnan ketpeıdi. Degenmen, óz ata-anama da alǵys aıtqym keledi. Sol kisilerdiń aqylymen men qazaq synybynda oqydym. Saqypjamal degen alǵashqy ustazymnyń arqasynda qazaq tiliniń qasıetin sezindim. Qazirgi tańda Ahmet Baıtursynov atyndaǵy Qostanaı memlekettik ýnıversıtetinde Jýrnalıstıka mamandyǵy boıynsha magıstratýrada oqımyn», - dedi ol.

Alla Chechetkına QR Tuńǵysh Prezıdentiniń «Qazaq pen qazaq - qazaqsha sóılessin!» degen sózi ómirlik maqsatyna aınalǵanyn basa aıtty.

«Sondyqtan men, qazaqtyń nanyn jep, sýyn iship óskendikten, eń aldymen qazaq tiline qurmet kórsetilýin talap etemin. Memlekettik tilde sóılemesek, bilýge tyryspasaq, bizdiń táýelsizdigimizge, egemendigimizge qosqan úlesimiz nemen ólshenedi? Barlyq qandas baýyrlarymdy qazaq tilin bilýge, súıýge, ómirine rýhanı azyq etýge shaqyramyn. Jahandaný zamanynda qazaqy tárbıe umytylmasa degen tilegim bar. Bizdiń aýylda qyz balanyń keshki ýaqytta kóshe kezip júrgeni uıat, ersi sanalatyn. Ózimnen keıin ósip kele jatqan sińlilerim de osy tárbıeden alshaqtamasa eken deımin», - dedi Alla Chechetkına.