Moldovalyq depýtattar parlament saılaýyn qyrkúıekke belgileýi múmkin

ASTANA. KAZINFORM — 17 sáýirde moldovalyq depýtattar 28 qyrkúıekte parlament saılaýyn ótkizý týraly sheshim qabyldaýy múmkin, dep habarlaıdy TASS.

Bul týraly joǵarǵy zań shyǵarýshy organnyń vıtse-spıkeri Vlad Batryncha málim etti.

— Beısenbi kúni depýtattar kezekti parlament saılaýynyń merzimin 28 qyrkúıekke belgileıdi dep kútilip otyr, — dedi ol.

Onyń sózinshe, zań komıssııasynda talqylanǵannan keıin bul másele kún tártibine engizilgen.

Moldova – parlamenttik respýblıka, munda naqty bılik parlamenttik kópshilik taǵaıyndaıtyn úkimettiń qolynda. Parlament saılaýy ár tórt jyl saıyn ótedi, sońǵysy 2021 jyldyń 11 shildesinde boldy. Parlamentte prezıdent Maııa Sandýny qoldaıtyn «Áreket jáne yntymaqtastyq partııasy» kóp oryn aldy.

2022 jyly elde Sandý men «Áreket jáne yntymaqtastyq partııasy» qurǵan úkimettiń otstavkasyn talap etken jappaı narazylyq aktsııalary bastaldy. Narazylyqqa qatysýshylar bılikti baǵanyń kúrt ósýi men kedeıliktiń artýyna kinálady. Jaýap retinde Sandý oppozıtsııany memlekettik tóńkeris jasamaq boldy dep aıyptady. Elde oppozıtsııaǵa sóz bergen ondaǵan BAQ jabyldy, al iri partııalardyń lıderlerine qarsy qylmystyq ister qozǵaldy.

Sarapshylardyń aıtýynsha, Moldovadaǵy bılik partııasy sońǵy aılarda saılaýshylardyń qoldaýynan qaǵylyp keledi. Naýryzda Marketıng jáne áleýmettik zertteýler ınstıtýty júrgizgen saýalnamaǵa sáıkes, «Áreket jáne yntymaqtastyq partııasy» aldaǵy saılaýda parlamenttegi baqylaýdy joǵaltady.

Buǵan deıin Moldova Biryńǵaı eýro tólem aımaǵyna qosylǵanyn jazǵanbyz.