Moldovadan kelgen sarapshy qaraǵandylyq akýsher-gınekologtarǵa trenıng ótkizýde
QARAǴANDY. QazAqparat - Temirtaý qalasynyń Kópsalaly ana men bala ortalyǵynda «Tıimdi perınataldy kútim» atty oqý semınary ótip jatyr. Oǵan óńirimizdiń túrli emhanalary men perzenthanalarynan ondaǵan akýsher qatysýda, dep habarlaıdy QazAqparat tilshisi.
Qaraǵandy oblystyq Densaýlyq saqtaý basqarmasynyń baspasóz qyzmetinen málim etkendeı, dáristerdi Kıshınev memlekettik medıtsına jáne farmatsııa ýnıversıtetiniń akýsherlik jáne gınekologııa kafedrasynyń medıtsına ǵylymdarynyń doktory Bologan Ion oqýda. Ol Dúnıejúzilik densaýlyq saqtaý uıymynyń ulttyq sarapshysy, 11 jyldan astam ýaqyttan beri qazaqstandyq medıtsınalyq uıymdarmen seriktestikte qyzmet etýde. Onyń aıtýynsha, elimizde búgingi tańda júrgizilip jatqan baǵdarlamalar jaqsy nátıjeler berýde.
«Men qaraǵandylyq dárigerlerdiń tájirıbe jınap jatqanyna qýanyshtymyn. Árqashan óz bilimimen bólisýge daıynmyn», - dedi dáristerdiń birinde Bologan Ion.
Oqý 5 kúnge sozylady. Qaraǵandylyq dárigerler teorııalyq bilimmen qosa, is-tájirıbeden ótedi. Trenıngterde ana qaýipsizdigi, júktilik kezdegi juqpaly aýrýlar, aýyr bosaný, eń bastysy - qalypsyz jaǵdaılarda akýsherler ózderin qalaı ustaý kerektigine qatysty taqyryptar qozǵalady.
«Jattyqtyrýshy ár akýsher jáne dárigermen bosaný kezinde bolýy múmkin túrli jaǵdaılardy talqylap, olardan shyǵý joldaryn kórsetýde. Biz qalypsyz jaǵdaılar týyndaǵan jaǵdaıda ne isteý kerektigin úırendik»,- deıdi Temirtaý qalasynyń Ana men bala ortalyǵynyń dırektory Sáýle Amanjolova.
Perınataldyq kútim boıynsha trenıngti Qaraǵandy oblysy Densaýlyq saqtaý basqarmasynyń qoldaýymen «Astana» oqý-klınıkalyq ortalyǵynyń Qaraǵandydaǵy bólimshesi uıymdastyrýda. Oqý kýrsy aıaqtalǵan soń barlyq tyńdaýshylarǵa sertıfıkattar tabystalady.
