Moldovada A/N1N1 tumaýynan aýrýdy syrqattan juqtyryp alǵan dáriger kóz jumdy
ASTANA. Jeltoqsannyń 15-i. QazAqparat - Moldovada A/N1N1 tumaýynan aýrýdy naýqastan juqtyryp alǵan dáriger kóz jumdy,
dep habarlaıdy QazAqparat RBK agenttigine silteme jasap.
Osylaısha, elde «dońyz tumaýynan» kóz jumǵandardyń sany 15 adamǵa jetti, dep habarlady respýblıkanyń Densaýlyq saqtaý mınıstrliginen.
Vedomstvonyń aqparaty boıynsha, Respýblıkalyq klınıkalyq aýrýhananyń alǵashqy medıtsınalyq kómek kórsetý bóliminiń bastyǵy Evgenııa Bordeı osydan bir apta buryn ózi emdegen patsıentten pandemııalyq tumaý juqtyryp alǵan. Ol aýrýhanaǵa jatýdan bas tartqandyqtan ahýaly nasharlap, dárigerlerdiń bar kúsh-jiger salǵanyna qaramastan qaıtys bolǵan.
Moldovanyń Densaýlyq saqtaý mınıstrliginiń málimetteri boıynsha, elde A/N1N1 tumaýyn juqtyrǵandardyń sany 2,3 myńǵa jýyqtap otyr. «Dońyz tumaýynan» alǵashqy kisi ólimi aǵymdaǵy jyly qazannyń 23-inde tirkelgen edi.
