Moldova Joǵarǵy sotynyń aldynda bir adam ózin órtep jiberdi
ASTANA. Qazannyń 12-si. QazAqparat - Moldovada 35 jastaǵy bir er azamat Kıshıneýdegi Joǵarǵy sot palatasynyń aldynda ózin-ózi órtep jiberdi.
Bul týraly Moldovanyń Іshki ister mınıstrligine silteme jasap RBK agenttigi habarlap otyr.
Álgi azamattyń tulǵasy anyqtaldy. Ol Beltsy qalasynyń 35 jastaǵy turǵyny Mıhaıl Býrdenıýk bolyp shyqqan. Aldyn ala málimetter boıynsha, ol óziniń isi boıynsha qabyldanǵan sottyń sheshimine narazylyǵyn bildirip, ózine qol jumsaǵan.
Otqa oranǵan azamatty kúzet qyzmetkeriniń qutqaryp qalǵany habarlanýda. Zardap shegýshi kúıik ortalyǵyna jetkizilgen. Dárigerler onyń denesiniń 15 paıyzyn kúıik shalǵanyn, ІІІ jáne IV kúıik jaraqatyn alǵanyn aıtyp otyr. Qazir onyń ómirine qaýip joq.
Quqyq qorǵaý organdary osy oqıǵa boıynsha is qozǵap otyr, eń aldymen olar, ózine qol jumsaǵan álgi azamatqa psıhıatrııalyq saraptama júrgizbek.
