Moldova TMD quramynan shyǵý týraly túpkilikti sheshim qabyldady
ASTANA. KAZINFORM — Moldova parlamenti eldiń Táýelsiz Memleketter Dostastyǵynan (TMD) shyǵýyn túpkilikti qoldap, negizgi quryltaı kelisimderiniń kúshin joıý týraly zań jobasyn sońǵy oqylymda qabyldady, dep habarlaıdy moldpres.md.
Qujatty 101 depýtattyń 60-y qoldady. Olardyń qatarynda bıliktegi «Áreket jáne yntymaq» partııasynyń ókilderi, sondaı-aq birqatar ózge depýtattar bar. Al kommýnıster men sotsıalıster fraktsııalary bul sheshimge qarsy shyqty.
Kommýnıster partııasynyń jetekshisi Vladımır Voronın TMD-dan shyǵýdy «el úshin tragedııa» dep atap, onyń ekonomıkaǵa teris áseri bolýy múmkin ekenin málimdedi.
Eske salsaq, Kıshınev TMD quramynan shyǵý úderisin osy jyldyń qańtarynda bastaǵan. Sol kezde bul sheshimdi úkimet maquldaǵan edi. Endi qujatqa el prezıdenti Maııa Sandý qol qoıýy tıis.
Moldova syrtqy ister mınıstri Mıhaı Popshoı buǵan deıin eldiń TMD aıasyndaǵy barlyq kelisimderden tolyqtaı bas tartpaıtynyn aıtqan. Onyń aıtýynsha, ekonomıkalyq turǵydan tıimdi nemese azamattar úshin mańyzdy kelisimder, eger olar eldiń Eýropalyq odaqqa yqpaldasý baǵytyna qaıshy kelmese, saqtalady.
Aıta keteıik, Moldovanyń TMD-ǵa qatysty ustanymy 2020 jylǵy prezıdent saılaýynan keıin ózgere bastady. Sol kezde Maııa Sandý eldiń Eýropalyq odaqpen ıntegratsııa baǵytyn jarııalap, Dostastyq sammıtterine qatysýdan bas tartqan bolatyn. 2023 jyldan beri respýblıka TMD-nyń 70-ke jýyq kelisimin denonsatsııalady.
Burynǵy prezıdent ári sotsıalıster partııasynyń jetekshisi Igor Dodon bul qadamdardy synap, Sandýdyń Reseımen jáne TMD-men baılanysty úzý saıasatyn halyq múddesine qaıshy dep baǵalady.
Aıta ketsek, osy jylǵy qańtar aıynda Moldova TMD quramynan shyǵatynyn jarııalady.
