Moldova TMD quramynan shyǵatynyn jarııalady
ASTANA. KAZINFORM — Moldova Táýelsiz Memleketter Dostastyǵymen (TMD) jasalǵan negizgi kelisimderdi denonsatsııalaý rásimin bastady. Bul elge uıym quramynan resmı túrde shyǵýǵa múmkindik beredi, dep habarlaıdy TASS.
Bul týraly Moldovanyń vıtse-premeri ári syrtqy ister mınıstri Mıhaı Popshoı málimdedi.
— Biz TMD-daǵy músheligimizdi aıqyndaıtyn úsh negizgi qujatty denonsatsııalaý úderisin bastadyq. Olar — uıymnyń Jarǵysy, TMD-ny qurý týraly kelisim jáne oǵan qatysty qosymsha qujat. Osy qujattar kúshin joıǵannan keıin Moldovanyń zańdy turǵyda TMD múshesi bolmaıdy. Degenmen is júzinde (de-fakto) qatysýymyz buǵan deıin-aq toqtatylǵan. Qujattar túpkilikti bekitý úshin parlamentke joldanady, — dep túsindirdi Popshoı.
Onyń aıtýynsha, denonsatsııalaý úderisi úkimet deńgeıinde aqpan aıynyń ortasyna qaraı aıaqtalady, sodan keıin parlament bul máseleni prezıdenttiń bekitýine usynady.
Moldovanyń TMD-ǵa degen kózqarasy 2020 jylǵy prezıdenttik saılaýdan keıin ózgere bastady. Sol kezde Maııa Sandý Eýropalyq odaqpen ıntegratsııa baǵytyn jarııalap, Dostastyq sammıtterine qatysýdan bas tartqan edi. 2023 jylǵy aqpanda respýblıka úkimeti TMD aıasyndaǵy 282 kelisimniń 120-dan astamyn denonsatsııalaýdy josparlap, el úshin eń mańyzdy ári paıdaly kelisimderdi saqtap qalýdy kózdegen.
Moldovanyń burynǵy prezıdenti ári Sotsıalıster partııasynyń kóshbasshysy Igor Dodon bul qadamdardy synǵa alyp, Maııa Sandýdyń Reseımen jáne TMD-men qatynasty úzýge baǵyttalǵan saıasaty halyq múddesine qaıshy keledi dep málimdedi.
Eske salaıyq, ótken jyldyń sońynda Kıshınev qalasynda Moldova Respýblıkasynyń prezıdenti Maııa Sandýdyń ınaýgýratsııasy ótti. Ol qarasha aıynda ótken saılaýdyń ekinshi týrynda 55 paıyzdan astam daýys jınap, ekinshi merzimge qaıta saılanǵan. Ant qabyldaǵannan keıin sóılegen sózinde Sandý barlyq qysymǵa qaramastan azamattar aıqyn baǵytty — qaýipsizdigi joǵary, damyǵan ári gúldengen eýropalyq eldi tańdaǵanyn atap ótti.
Aıta keteıik, Moldovanyń EO-ǵa kirý týraly kelissózderi 2027 jylǵa deıin aıaqtalýy múmkin.
Byltyr 7 naýryzda atalǵan el Biryńǵaı eýro tólem aımaǵyna qosyldy.