Moldova energııa tapshylyǵyna baılanysty elektr jaryǵyn kezeń-kezeńimen óshirmek
ASTANA. KAZINFORM — Moldova bıligi energııa resýrstarynyń tapshylyǵyna baılanysty elektr energııasyn kezeń-kezeńimen óshirý múmkindigin qarastyryp jatyr. Bul týraly el premer-mınıstri Vasıle Tofan málimdedi, dep habarlady Belta.
Premer-mınıstrdiń aıtýynsha, bılik qymbat elektr energııasyn bırjadan satyp alýdyń ornyna elektr qýatyn josparly túrde óshirý nusqasyn talqylap jatyr. Ol elektr energııasynyń qysqa ýaqytqa óshirilýi turǵyndardy energııany únemdep tutynýǵa yntalandyrýy múmkin ekenin atap ótti.
Buǵan deıin úkimet basshysy eldiń energetıka salasyndaǵy ahýaldyń kúrdeli ekenin aıtqan. Elektr energııasynyń tapshylyǵyn bırjadan satyp alý arqyly óteýge týra kelip otyr. Al ondaǵy elektr energııasynyń baǵasy ádettegi deńgeıden eki-úsh ese joǵary.
Tamyz aıynyń basynda Moldova bıligi Dnestr ózenindegi sý deńgeıiniń tómendeýine jáne energetıkalyq naryqtardaǵy baǵanyń ósýine baılanysty sýdy paıdalanýǵa shekteý qoıyp, elektr energııasyn tutynýdy azaıtý sharalaryn da engizgen.
Eske salaıyq, buǵan deıin Majarstan 44 jylda alǵash ret eldegi jalǵyz atom elektr stantsııasy — «Paksh» AES-iniń jumysyn toqtatatynyn habarlaǵan edik. Buǵan Dýnaı ózenindegi sý deńgeıiniń rekordtyq tómendeýi sebep boldy.
