Moldova Respýblıkasynyń tikushaǵy Taraz qalasynyń áýejaıyna apatty jaǵdaıda qondy
ASTANA. Naýryzdyń 20-sy. QazAqparat - Moldova Respýblıkasynyń tikushaǵy apatty jaǵdaıda Taraz qalasynyń halyqaralyq áýejaıyna qondy,
dep habarlady Qazaqstannyń Tótenshe jaǵdaılar mınıstrliginen.
Vedomstvo baspasóz qyzmetinen málim etkendeı, naýryzdyń 18-i kúni tańerteńgi saǵat 11.22-de Taraz qalasynyń «Áýlıe Ata halyqaralyq áýejaıynan» «Taraz-Qyzylorda» baǵytynda Moldova Respýblıkasynyń «VALAN-Interneshenel Kargo Charter» avıakompanııasyna tıesili MI-8 № ER-MNR tikushaǵy ushyp shyqqan. Biraq 3600 metr bıiktikte tikushaqtyń on jaq qozǵaltqyshy kenet isten shyǵyp, ol 11 saǵat 44 mınýtta apatty jaǵdaıda qaıta qonýǵa májbúr boldy.
«Zardap shekkender men qurban bolǵandar joq. Tikushaqtyń bortynda 5 adam jáne 11 300 keli salmaqta (ruqsat etilgen kólemde) júk boldy. Oqıǵa boıynsha tergeý amaldary júrgizilýde», dep málim etti baspasóz qyzmetinen.
