Moldova prezıdenti úkimettiń otstavkasyn qabyldady
KIShINEV.QazAqparat - Moldova premer-mınıstri Natalıa Gavrılıtsa juma kúni premer-mınıstr qyzmetinen ketetinin málimdedi. Bul Konstıtýtsııaǵa sáıkes, mınıstrler kabınetiniń tolyq quramynyń otstavkaǵa ketýin bildiredi, dep habarlaıdy QazAqparat reseılik TASS agenttigine silteme jasap.
«Premer-mınıstr bolǵan bir jarym jyldan keıin meniń otstavkaǵa ketetinimdi jarııalaıtyn kez keldi», - degen Gavrılıtsa bul sheshiminiń sebebin aıtýdan bas tartty.
Ol óz sózinde mınıstrler kabınetiniń sybaılas jemqorlyqpen kúres, eýropalyq ıntegratsııa, sot júıesin reformalaý, energetıkalyq daǵdarysqa qarsy turý jáne aımaqtaǵy kúrdeli jaǵdaı boıynsha jetistikterine toqtaldy.
Premer-mınıstr brıfınginiń aldynda prezıdent Maııa Sandý ákimshiliginde kezdesý ótip, oǵan úkimet músheleri men parlamentti baqylaıtyn eýropalyq áreket pen yntymaqtastyq partııasynyń ókilderi qatysty.
Moldova prezıdenti Maııa Sandý premer-mınıstr Gavrılıtsa bastaǵan el úkimetiniń otstavkasyn qabyldady.
«Men premer-mınıstr Natalıa Gavrılıtsanyń otstavkaǵa ketýin nazarǵa aldym. Zańdy rásimder ótkizilip, premer-mınıstr otstavkaǵa ketkennen keıin men parlamenttik fraktsııalarmen konsýltatsııalar ótkizemin, sodan keıin premer-mınıstr laýazymyna kandıdatty usynamyn», - dep jazdy Sandý Facebook-tegi paraqshasynda.
Natalıa Gavrılıtsa basqarǵan úkimet 2021 jyldyń tamyzynda merziminen buryn ótken saılaýda jeńiske jetken eýropashyl áreket jáne yntymaqtastyq partııasymen qurylǵan. 2022 jyldyń maýsymynda Moldovada oppozıtsııanyń narazylyq sherýleri bastaldy. Mıtıngterde sóz sóılegen azamattar gaz jáne basqa da energetıkalyq resýrstar, janar-jaǵarmaı, azyq-túlik baǵasynyń buryn-sońdy bolmaǵan deńgeıde qymbattaýyna, sondaı-aq ómir súrý deńgeıiniń tómendeýine narazylyq bildirdi. Bılik oppozıtsııa ókilderine saıası qysym jasaǵany úshin de synǵa ushyraǵan bolatyn.
Foto: EPA-EFE/ DUMITRU DORU
