Moldova premer-mınıstri kelesi úkimetti basqarýdan bas tartty

ASTANA.KAZINFORM — Moldovanyń qazirgi premer-mınıstri Dorın Rechan parlament saılaýynan keıin Áreket jáne yntymaqtastyq partııasy (PAS) qurǵan úkimetti basqarýdan bas tartty, dep habarlaıdy TASS.

Rıchan óz sheshimin partııa tóraǵasy Igor Grosýmen birlesken baspasóz máslıhatynda málimdedi.

— Biz Rechandi premer-mınıstrlikke kandıdat retinde usynýdy josparlaǵan bolatynbyz, biraq ol bizge onyń úkimettegi qyzmeti osy kezeńde aıaqtalatynyn habarlady, — dedi Grosý.

Rechan saıasattan ketip, bızneske qaıta oralý nıetin túsindirdi.

— Men budan bylaı qoǵamdyq jáne saıası ómirge aralaspaımyn. Jańa úkimet bekitilgennen keıin men de depýtattyq mandatymdy tastap, birneshe jyl buryn ýaqytsha tastap ketken kásibı qyzmetime oralamyn, — dedi Premer-Mınıstr.

Grosý bolashaq úkimet basshysyna kandıdatty Moldova prezıdenti Maııa Sandý parlamenttegi partııa fraktsııalarymen keńeskennen keıin usynatynyn túsindirdi. Atalmysh partııa saılaýda kópshilik daýysqa ıe boldy jáne úkimetti derbes qura alady. Grosý jaqsy jumys istegen mınıstrler óz qyzmetterin saqtap qalýy múmkin ekenin atap ótti. Alaıda, bul máselede sońǵy sóz jańa premer-mınıstrge tıesili bolady.

Moldovanyń Konstıtýtsııalyq soty saılaý nátıjelerin 16 qazanda bekitedi. Osydan keıin Sandý parlamenttiń birinshi sessııasyn shaqyrý týraly jarlyqqa qol qoıady. Ortalyq saılaý komıssııasynyń málimeti boıynsha, úkimettik partııa parlamenttegi 101 orynnyń 55-ine ıe boldy (2021 jylǵy saılaýmen salystyrǵanda segiz orynǵa az). Sotsıalıstik partııanyń tóńireginde qurylǵan Patrıottyq blok 26 orynǵa ıe boldy. «Alternatıvti» blok (segiz oryn), «Bizdiń partııa» jáne «Úıdegi demokratııa» (árqaısysy altydan) da parlamentke endi.

Esterińizge sala keteıik, Moldovada 28 qyrkúıekte parlamenttik saılaý ótti.

Saılaý ýchaskeleriniń 99,5 paıyzynda daýystar eseptelip, prezıdent Maııa Sandý basqaratyn «Áreket pen yntymaqtastyq» partııasy parlamenttik saılaýda aıqyn basymdyqpen kópshilik daýysyna qol jetkizdi.