Moldova Parlamenti úkimetti otstavkaǵa jiberdi
ASTANA. 5 naýryz. QazAqparat - Moldova Parlamenti Lıberaldyq-demkokratııalyq partııanyń kóshbasshysy premer-mınıstr Vladımır Fılat basqarǵan qazirgi úkimetke senimsizdik bildirdi.
Bul týraly RBK respýblıkanyń joǵarǵy zań shyǵarýshy organyna silteme jasap habarlady.
El úkimetin otstavkaǵa jiberýge Kommýnıster partııasynan, Demokratııalyq partııadan jáne táýelsiz parlamentshiler arasynan 54 depýtat daýys berdi. Qoldanystaǵy zańnamaǵa sáıkes senimsizdik kórsetilgen respýblıka mınıstrler kabıneti úsh kúnniń ishinde otstavkaǵa ketýi tıis.
V.Fılattyń úkimetin otstavkaǵa jiberýge 2013 jylǵy 28 aqpanda Kommýnıster partııasy bastamashy boldy. Kommýnıster sońǵy kezde úkimet sybaılas jemqorlyqqa belshesinen batty, onyń músheleri krımınaldyq qurylymdarǵa tartyldy, al keıbiri qozǵalǵan qylmystyq ister aýqymynda aıyptylar mártebesine ıe boldy, dep málimdedi. Dempartııa men táýelsiz depýtattar Kommýnıster partııasynyń úkimetti otstavkaǵa ketirý bastamasyn qoldady.
V.Fılat basqaratyn Moldova lıberal-demokratııalyq partııasy (MLDP) budan buryn partııa kóshbasshysy ózdiginen otstavkaǵa ketpeıtinin málimdegen bolatyn, úkimet otstavkaǵa ketse, lıberal-demokrattar V.Fılattyń kandıdatýrasyn qaıtadan premer qyzmetine usynbaq. MLDP parlamenttik fraktsııasynyń basshysy Valerıı Strelets V.Fılat kásibı adam jáne premer laýazymynda ol óziniń mandatyn laıyqty oryndady, al ol erikti túrde otstavkaǵa ketetin bolsa, onda onyń atyna sońǵy kezderi aıtylǵan aıyptardy janama túrde bolsa da moıyndaǵandyq bolar edi, dep atap ótti.
V.Fılat basqarǵan qazirgi úkimet koalıtsııalyq bolyp tabylady. Ol 2011 jylǵy 14 qańtarda bekitildi. Mınıstrler kabınetindegi portfelder eýropalyq yqpaldastyq úshin bıleýshi alıans qurý týraly kelisimder aýqymynda qol jetkizilgen ýaǵdalastyqtarǵa sáıkes bólingen.
Moldova Konstıtýtsııasyna sáıkes parlament kópshilik daýyspen (101-diń 51-i) úkimetke senimsizdik bildire alady.
