Moldova Qazaqstanda elshiligin ashýdy josparlap otyr
ORAL. KAZINFORM – Moldova Respýblıkasynyń Syrtqy ister mınıstrligi jaqyn arada Qazaqstanda dıplomatııalyq ókildik ashý boıynsha qarqyndy jumys júrgizip jatyr, dep habarlady Moldova premer-mınıstriniń orynbasary jáne Syrtqy ister mınıstrliginiń basshysy Mıhaı Popshoı.
Moldova1 qoǵamdyq telearnasynda Mıhaı Popshoı jańa elshiliktiń ashylýy Moldovaǵa Ortalyq Azııa elderimen jáne Moldovamen jaqsy seriktestik qarym-qatynas ornatqan Qazaqstanmen mádenı jáne ekonomıkalyq baılanystardy keńeıtýge múmkindik beretinin aıtty.
«Biz qazir Qazaqstanda elshilik ashý jumystaryn júrgizip jatyrmyz. Onda Moldova Respýblıkasynyń Ortalyq Azııa elderi úshin óziniń dıplomatııalyq ókildigi bolady. Bizdiń Qazaqstanmen ejelden kele jatqan tarıhı baılanysymyz bar. Munda moldavan dıasporasy bar, moldovandar rýmyn tilinde sóıleıdi», - dedi Moldova premer-mınıstriniń orynbasary jáne Syrtqy ister mınıstrliginiń basshysy.
Ol Moldovanyń energetıkalyq qaýipsizdigin qamtamasyz etý úshin mańyzdy sanalatyn Qazaqstan Respýblıkasynda energetıkalyq resýrstardyń úlken qory bar ekenine nazar aýdardy.
«Qazaqstan Respýblıkasynyń Moldova ekonomıkasyna – munaı ónimderi naryǵynyń operatory Rompetrol jáne bizdiń elimizde birqatar qurylymdyq jobalardy júzege asyrýǵa qatysatyn basqa da kompanııalarǵa tikeleı ınvestıtsııalary bar», - dep atap ótti Mıhaı Popshoı.
Moldova Syrtqy ister mınıstri Moldovanyń sheteldegi dıplomatııalyq ókildikterin keńeıtý perspektıvasy týraly aıta kele, 2025 jyly Mysyrda elshilik ashý isin bastaýǵa nıetti ekenin aıtty.
