Moldova Biryńǵaı eýro tólem aımaǵyna qosyldy
ASTANA. KAZINFORM — Moldova resmı túrde Biryńǵaı Eýro /SEPA/ tólem aımaǵyna qosyldy, bul el azamattary men bıznesi úshin tranzaktsııalyq shyǵyndardy azaıtady, dep jazady Sınhýa.
Beısenbide Brıýsseldiń sheshiminen keıin eldiń SEPA-ǵa qosylýy halyqaralyq aýdarymdar komıssııalaryn tómendetedi. Bul óz kezeginde shetelde jumys istep, úıine aqsha jiberetin moldovalyqtarǵa paıdasyn tıgizedi, dedi Moldova Ulttyq bankiniń basshysy Anka Dragý.
Onyń baǵalaýy boıynsha SEPA-ǵa múshelik etý Moldovaǵa jyl saıyn shamamen 12 mıllıon eýro únemdeýge múmkindik beredi, al orta merzimdi perspektıvada áleýetti únemdeý 20 mıllıon eýroǵa jetedi.
SEPA Moldova eksportynyń básekege qabilettiligin arttyra otyryp, bıznes úshin eýro valıýtasy tranzaktsııalaryndaǵy qosymsha tólemder men kidiristerdi joıady. Bul rette Moldova eksportynyń 60 paıyzy EO-ǵa baratynyn aıta ketken jón.
Endi Moldova bankteri SEPA-ǵa ıntegratsııalaný úshin tehnıkalyq jańartýdan ótedi. Bul birneshe aıǵa sozylýy múmkin.
SEPA — EO elderinde jáne basqa qatysýshy memleketterde eýro tólemderin standarttaıtyn, ishki jáne transshekaralyq tranzaktsııalar arasyndaǵy aıyrmashylyqtardy joıatyn eýropalyq júıe.
Aıta keteıik, Moldova 2024 jyldyń qańtarynda SEPA-ǵa qosylýǵa ótinish berdi.
Budan buryn Interpoldyń izdeýinde júrgen Qyrǵyzstan prezıdentiniń burynǵy kómekshisi Moldovada ustalǵanyn jazǵan edik.