Moldova basshysy N.Tımoftı N.Nazarbaevty QR Prezıdenti saılaýyndaǵy jeńisimen quttyqtady
ASTANA. QazAqparat - Nursultan Nazarbaevtyń Qazaqstan Prezıdenti bolyp saılanýyna baılanysty Moldova Respýblıkasynyń Prezıdenti Nıkolae Tımoftı quttyqtaý jedelhatyn joldady, dep habarlady Aqordanyń baspasóz qyzmetinen.
N.Tımoftı Nursultan Nazarbaevtyń prezıdent saılaýyndaǵy aıqyn jeńisine baılanysty shyn júrekten quttyqtaıtynyn jetkizdi.
Moldova Prezıdenti Qazaqstan azamattarynyń erik-qalaýy men saılaýda qol jetkizilgen nátıje Qazaqstan qoǵamyn reformalaýdy jalǵastyrý jáne respýblıkany álemdik qoǵamdastyqpen yqpaldastyrý jolymen ilgeriletý baǵytynda júrgizilip kele jatqan eldegi saıasatty qoldaýdyń dáleli ekenin atap ótken. «Joǵary memlekettik laýazymdaǵy Sizdiń qyzmetińiz Qazaqstannyń odan ári ósip-órkendeýine jáne eki eldiń de halqynyń ıgiligi úshin ózara tıimdi Moldova-Qazaqstan yntymaqtastyǵynyń óristeýine septigin tıgizedi dep nyq senim bildiremin», delingen jedelhatta. Sondaı-aq, N.Tımoftı Qazaqstan Prezıdentin resmı saparmen Moldovaǵa kelýge shaqyryp, sapar eki el arasyndaǵy dástúrli dostyq qarym-qatynastar aıasyn keńeıtýge jáne ony tereńdete túsýge eleýli serpin bererine senim bildirdi. Nursultan Nazarbaevqa Moldova Prezıdenti myqty densaýlyq, joǵary memlekettik qyzmette tabys, al Qazaqstan halqyna tatýlyq pen baq-bereke tiledi.
