Moldavııanyń jańa basshysy reseılik áskerlerdi Prıdnestroveden shyǵarýǵa shaqyrdy
ASTANA. 18 naýryz. QazAqparat - Moldavııanyń 16 naýryz kúni saılanǵan jańa prezıdenti Nıkolae Tımoftı reseılik áskerlerdi moıyndalmaǵan Prıdnestrove respýblıkasy aýmaǵynan shyǵarýǵa
jáne onda qyzmet atqaryp otyrǵan bitimgerlerdi azamattyq baqylaýshylar men halyqaralyq mandatqa aýystyrýǵa shaqyrdy. Bul týraly ol parlament depýtattarymen áńgimelesý barysynda málimdedi, dep habarlaıdy RBK.
Prezıdent sondaı-aq prednestrovelik qaqtyǵysty beıbit jolmen sheshý (kepil retinde Reseı tartylǵan kelissózderdiń qazirgi úlgisin saqtaýmen birge) qajettigin atap ótti.
Buǵan deıin Nıkolae Tımoftı Moldavııanyń qazirgi jetekshiliginiń Eýropamen jaqyndasý boıynsha baǵytyn jaqtaýshy bolyp tabylatynyn atap ótken edi. Óziniń prezıdent retindegi shetelge alǵashqy saparyna ol Brıýsseldi tańdady.
KSRO kezinde Moldavııa jáne Prıdnestrove aýmaǵynda 14-shi jalpy jaýyngerlik ásker ornalasqan. Keńes Odaǵynyń ydyraýynan keıin ol Reseı qaraýyna ótti. 1990 jyldardyń basynda reseılik áskerler Prıdnestrovedegi qarýly qaqtyǵystarǵa aralasyp, onyń aıaqtalýyna bolysty. 1990 jyldardyń ortasynda 14-shi áskerı armııa taratylyp, onyń bir bóligi aımaq aýmaǵynan shyǵaryldy. Prıdnestrovede bitimgershilik mindetterdi sheshý úshin jedel top qaldyryldy. Onyń quramynda eki motoatqyshtar batalony, kúzet jáne qyzmet kórsetý batalony, tikushaq jasaǵy qalǵan.
Ózin-ózi jarııalaǵan Prıdnestrove respýblıkasyn moldavııalyq aýmaq etip sanap júrgen Moldavııa bılikteri ol jerden Reseı áskerlerin shyǵarýdy (bitimgerlerdi halyqaralyq kontıngentke aýystyrý múmkindigimen) talaı ret talap etken bolatyn.
Bul talaptardy dáıekteı otyryp, Kıshınev ásirese óz aýmaǵynda (ıaǵnı resmı túrde - Prıdnestrovede de) sheteldik áskerlerdi ornalastyrýǵa tyıym salatyn Moldavııanyń Konstıtýtsııada bekitilgen beıtaraptyq mártebesine silteme jasaıdy.
Esterińizge sala keteıik, Reseı Prıdnestroveniń táýelsizdigin resmı túrde moıyndamaıdy (ózin-ózi jarııalaǵan respýblıka halyqaralyq moıyndaýǵa ıe bolǵan joq), alaıda oǵan ekonomıkalyq járdemin kórsetýde.
