Moldavııalyq túrmede esirtki tasymaldaǵysh mysyq quryqtaldy
ASTANA. 20 qazan. QazAqparat - Moldavııalyq túrmeniń kúzetshileri túzetý mekemesine marıhýana tasý úshin paıdalanylǵan mysyqty quryqtady. Bul týraly sheteldik BAQ habarlady.
«Kúdikti» mysyq abaqtyǵa dýaldaǵy tesik arqyly ótip bara jatqanda ustalǵan eken. Keıin janýardyń moınyndaǵy kúlgin tústi qarǵybaýynda marıhýana salynǵan eki qalta anyqtaldy.
Túzetý mekemesi basshylyǵynyń habarlaýynsha, esirtki tasymaldaǵysh mysyqty túrmemen kórshiles ornalasqan Prýnkýl eldi mekeni turǵyndarynyń biri paıdalanǵan kórinedi.
Maýsym aıynda Komı Respýblıkasyndaǵy túzetý kolonııasynda da tyıym salynǵan zattardy alyp ótpek bolǵan mysyq ustalǵan edi. Sol kezde onyń denesine bekitilgen eki uıaly telefon tabylǵan edi.
Buǵan qosa bıylǵy jyldyń basynda Brazılııadaǵy abaqtylardyń birinde qaraýylshylar sottalǵandarǵa kontrabanda tasymaldamaq bolǵan mysyqty ustady.
Atap aıtqanda, túzetý mekemesiniń aýmaǵyna tyıym salynǵan zattardy jetkizý úshin janýardy paıdalaný áreketi iske aspady. Mysyqqa artylǵan «júkti» túrmeniń bas qaqpasynyń aldyndaǵy qaraýylshylar baıqap qalǵan kórinedi. «Quryqtalǵan» mysyqtyń arqasyna burǵylar men egeýler, zarıadtaǵysh qurylǵysymen jabdyqtalǵan uıaly telefon jáne basqa da zattar skotchpen baılanǵan. Belgili bolǵandaı, bul zattar Arapırak qalasynyń abaqtysynan qashýǵa bel býǵandardyń daıyndyǵyna arnalǵan.
