Moldavııada ulttyq valıýta quldyrady, halyq dúkendegi azyq-túlikti jantalasa alyp jatyr
ASTANA. QazAqparat - Ótken jyly moldavııalyq leı baǵamy dollarǵa shaqqanda 20% tómendegen, jańa jyldan - 25%, al sońǵy kúnderi odan da ári tómendep barady.
Moldavııada ulttyq valıýtanyń quldyraýy saldarynan turǵyndar dúkendegi azyq-túlikti jáne ózge de taýarlardy jantalasyp satyp alýda. Sońǵy táýlikterde munda taýarǵa degen baǵa eki ret ósirildi.
Janar-jaǵarmaı baǵasy da qaryshtady. Janar-jaǵarmaı quıý beketteriniń kóbisi jabyq. Ashyq turǵandarynda uzyn- sonar kezek. Barlyǵy da burynǵy baǵamen satyp alýǵa tyrysýda.
Ulttyq bank prezıdenti Dorın Drýgýtsaný muny syrtqy faktorlardyń áseri dep túsindirdi. Ótken jyldyń jeltoqsanynda bul kórsetkish 2013 jyldyń jeltoqsanymen salystyrǵanda 50% tómendedi. Jaǵdaıdy turaqtandyrý úshin Ulttyq bank seısenbi kúni qysqa merzimdi operatsııalar boıynsha bazalyq paıyzdyq stavkany 8,5%-dan 13,5% deıin kóterdi.
Oppozıtsııa ókilderi bıliktiń bul sharalaryn synǵa aldy. Sotsıalıster partııasy qaýipsizdiktiń joǵary keńesin quryp, parlamenttiń shuǵyl otyrysyn ótkizýdi talap etti.
