Mogerını: Jańa Jibek joly - mańyzdy ınfraqurylymdyq jobalardyń biri
STRASBÝRG. QazAqparat - Eýropalyq odaq pen Ortalyq Azııa elderi jaqyndasty. Bul týraly Strasbýrgtegi Eýropalyq parlamenttiń plenarlyq sessııasynda EO-tyń Syrtqy ister jáne qaýipsizdik saıasaty jónindegi Joǵarǵy ókili Federıka Mogerını málim etti, dep habarlaıdy «QazAqparat» HAA menshikti tilshisi.
«Eýropa men Ortalyq Azııanyń bes eli buryn-sońdy qazirgideı jaqyn bolǵan joq. Olar bizdiń kórshilerimiz. Jibek joly - ótkendi eske alý emes, eń mańyzdy ınfraqurylymdyq jobalardyń biri», - dedi eýropalyq dıplomatııanyń basshysy.
Onyń aıtýynsha, Ortalyq Azııa qazirgi ýaqytta Eýropa men Azııa arasyndaǵy torap ispettes.
«Aýǵanstandaǵy nemese Taıaý Shyǵystaǵy oqıǵalar biz úshin de mańyzdy. Olardyń qaýipsizdigi - bizdiń qaýipsizdigimiz», - dep atap ótti F.Mogerını.
EO dıplomatııa basshysy atap ótkendeı, eýropalyq kompanııalar tek óńirge ǵana emes, sondaı-aq Eýropalyq odaqqa paıda ákele otyryp, Ortalyq Azııany ınvestıtsııalaýǵa umtylýda.
«Bıznes ortany jaqsartýǵa barlyǵymyz múddelimiz. Biz keńeıtilgen áriptestik pen yntymaqtastyq týraly kelisimderdiń jańa serpini boıynsha jumystardy bastadyq. Ondaı kelisimdi Qazaqstanmen jasastyq, qazir Qyrǵyzstanmen júrgizip jatyrmyz», - dedi F.Mogerını.
Sondaı-aq, ol EO syrtqy saıası vedomstvosynyń Ózbekstanmen, Túrikmenstanmen jańa kelisim boıynsha kelissózder júrgizýdi bastaıtynyn málim etti.
Aıta keteıik, Eýropalyq Odaqtyń Ortalyq Azııa boıynsha jańa strategııalardy ázirleý protsessi 2017 jyldyń qyrkúıeginde bastaldy.
