Moderna ázirlegen vaktsına keıbir qaterli isikterdi emdeý tásilin ózgertýi múmkin
ASTANA. KAZINFORM - Moderna kompanııasy ázirlegen jekelendirilgen mRNQ-vaktsına melanomanyń, ıaǵnı teri qaterli isiginiń agressıvti túriniń qaıta paıda bolý jáne taralý qaýpin tómendetti.
Klınıkalyq synaq nátıjeleri jarııalanǵannan keıin kompanııa aktsııalary 160 paıyzǵa deıin qymbattap, naryqtyq kapıtalızatsııasy shamamen $40 mlrd-qa ósti, dep habarlaıdy Reuters.
Klınıkalyq synaqtyń sońǵy kezeńindegi oń nátıjeler COVID-19 pandemııasynan keıin ónimder qataryn keńeıtýge umtylyp otyrǵan Moderna úshin mańyzdy jetistik boldy.
Kompanııanyń bıznesiniń qarqyndy ósýine buǵan deıin koronavırýsqa qarsy mRNQ-vaktsınasy aıtarlyqtaı yqpal etken edi.
Jekelendirilgen vaktsına ár patsıentke jeke ázirlenedi.
Ol ımmýndyq júıege isik jasýshalaryndaǵy ózine tán mýtatsııalardy tanyp, olardy joıýǵa múmkindik beredi.
Zertteý barysynda vaktsına Merck kompanııasynyń Keytruda preparatymen birge qoldanyldy.
Melanomany hırýrgııalyq jolmen alyp tastaǵan, biraq aýrýdyń qaıta paıda bolý qaýpi joǵary patsıentterde vaktsınany Keytruda-men biriktirip qoldaný tek Keytruda preparatymen emdeýge qaraǵanda jaqsy nátıje kórsetken.
Zertteý nátıjeleri bul tehnologııany qaterli isiktiń basqa túrlerine qarsy preparattar ázirleýge jol ashýy múmkin ekenin kórsetti.
Moderna, Merck jáne basqa da kompanııalar bul tásildi ókpe, sút bezi jáne uıqy bezi isikterin emdeýde zerttep jatyr.
Buǵan deıin Qazaqstanda ókpe qaterli isigin anyqtaýǵa arnalǵan jańa skrınıng iske qosylatyny habarlanǵan bolatyn.
