Modeldeýden tehnıkaǵa deıin: elimizde kóktemgi sý tasqynyna daıyndyq jumystary bastaldy
ASTANA. KAZINFORM – Úkimette Premer-mınıstrdiń orynbasary Qanat Bozymbaevtyń tóraǵalyǵymen «Qazgıdromet» RMK usynǵan jańartylǵan boljamdyq derekterdi eskere otyryp sý tasqyny kezeńine daıyndyq máseleleri qaraldy.
Eldegi ahýal týraly Tótenshe jaǵdaılar, Ekologııa jáne tabıǵı resýrstar, Tsıfrlyq damý, Sý resýrstary jáne ırrıgatsııa, sondaı-aq Kólik mınıstrlikteri baıandama jasady. Boljamdy eskere otyryp, sý tasqyny qaýpiniń deńgeıi boıynsha óńirler aıqyndaldy.
Premer-mınıstrdiń orynbasary Qanat Bozymbaev avtomobıl jáne temirjol joldarynyń sý ótkizý qabiletin arttyrý jónindegi sharalar týraly esepterdi tyńdady. Búgingi kúni 582 sý ótkizý qubyry salyndy, avtojoldardy rekonstrýktsııalaý barysynda 63 kópir turǵyzyldy. Shyǵys Qazaqstan jáne Qostanaı oblystarynda 5 apatty kópirge kúrdeli jóndeý júrgizildi.
Sonymen qatar vıtse-premerge sý tasqyny qaýpi bar óńirlerge jasalǵan issaparlardyń nátıjeleri jáne azamattyq qorǵaý kúshteriniń áreket etýge daıyndyǵy týraly baıandaldy. Tótenshe jaǵdaılardy joıý úshin sany 39 myńnan astam adam quraıtyn respýblıkalyq jáne óńirlik kúshter men quraldar toptastyryldy. Olardyń qaramaǵynda 12 myńnan astam tehnıka, 4 myńnan astam sý sorý quraly jáne 700-ge jýyq júzý quraly bar. 1 naýryzdan bastap TJM Jedel shtaby táýlik boıy jumys istep tur. Gıdrologııalyq jaǵdaı men sý tasqyny qaýpi bar aýmaqtardyń jaı-kúıine turaqty monıtorıng júrgizilip jatyr.
Osyǵan deıin Aqtóbede sý nysandary áýe sholýy arqyly baqylanǵanyn jazǵan edik.