Mobıldik aýdarymdardy tekserý: qazaqstandyqtarǵa aıyppul salyndy ma
ASTANA.KAZINFORM — Mobıldik aýdarymdardy tekserý nátıjesinde ázirge jeke tulǵalarǵa da, jeke kásipkerlerge de aıyppul salynbaǵan. Bul jóninde Májilis kýlýarynda Qarjy vıtse-mınıstri Erjan Birjanov málimdedi.
Onyń sózinshe, alǵashqy toqsandaǵy mobıldik aýdarymdar boıynsha derekter sáýir aıynda túsken. Olar óńdelgen soń, azamattarǵa mamyrdan bastap salyq jóninde habarlandyrýlar jiberile bastaǵan.
Vıtse-mınıstrdiń túsindirýinshe, habarlamany ártúrli sanattaǵy azamattar — kásipker retinde tirkelmegen jeke tulǵalar jáne ártúrli salyq rejımindegi kásipkerler — alyp jatyr.
— Jeńildetilgen salyq rejıminde jumys isteıtin kásipkerler bar. Olar alǵashqy jarty jylda esebin ótkizýi kerek. Somadaǵy aıyrmashylyqty deklaratsııada tolyqtyra alady. Ne bolmasa, jalpy bekitilgen rejımde qyzmet etetin jeke kásipkerler bar. Olar deklaratsııany jyl sońyna deıin tapsyrady. Demek, atalǵan somany qujatqa engize alady, — dedi ol.
Sonymen birge, Erjan Birjanov mınıstrlik azamattarǵa kiristerin kórsetý kerektigin eskertetinin aıtty.
— Ázirge eshqandaı jeke tulǵaǵa ne jeke kásipkerge aıyppul salynǵan joq. Biz olarǵa múmkindik berdik. Aldaǵy deklaratsııalarynda túzete alady, — dedi ol.
Aıta keteıik, buǵan deıin bıylǵy qańtardan bastap mobıldi aýdarym jasaǵanda neni eskerý kerek ekenin jazǵanbyz.
