Mobıldi keshen ornatylǵan polıtsııa kóligi arnaıy shamyn jaqpaı júrse, zańbuzýshylyq bolyp eseptele me
PAVLODAR. KAZINFORM – Qazirgi ýaqytta Ertis-Baıan óńirinde mobıldi keshendermen jáne tirkegishtermen jabdyqtalǵan 20 patrýldik avtokólik bar.
Pavlodar oblysynyń polıtsııasy avtokólikterdiń qozǵalysyn baqylaıtyn mobıldi keshender men kameralar sanyn kóbeıtip, joldaǵy qaýipsizdikti kúsheıtý kózdelip otyr. Osy oraıda Óńirlik jergilikti polıtsııa qyzmeti basqarmasynyń bastyǵy Qýanysh Mustafınovty áńgimege tarttyq.
- Sońǵy ýaqytta júrgizýshiler qaýymy oblys aýmaǵynda mobıldi keshender ornatylǵan patrýldik kólikterdiń kóbeıgenin baıqap otyr. Bul neden týǵan qajettilik? Aıypppuldy eselep, bıýdjettiń búıirin tompaıtý úshin be, álde júgensiz júrgizýshilerdi quryqtaýdyń amaly ma?
- Pavlodar oblysy boıynsha mobıldi keshendermen jáne tirkegishtermen jabdyqtalǵan patrýldik mashınalardyń sany búginde 20-ǵa jetti. Onyń jartysy - «Kıber Sherıf» jáne ózgesi «Ekin Patrol» júıeleri. Barlyq júıeler yqtımal jol-kólik oqıǵalarynyń aldyn alý maqsatynda respýblıkalyq, oblystyq jáne aýdandyq mańyzdaǵy avtojoldar boıyna jumyldyrylǵan. Sondaı-aq birnesheýi oblys ortalyǵyndaǵy qoǵamdyq tártipti jáne jol qaýipsizdigin qamtamasyz etýge qatysady. «Kıber-sherıf» pen «Ekin Patrol» borttyq apparattyq-baǵdarlamalyq keshenderi 360 gradýsta foto-beıne tirkeýin jáne panoramalyq beıne jazbasyn júzege asyra alady. Atap aıtqanda, memlekettik tirkeý nómirlerin taný, izdeý bazalary boıynsha tehnıkalyq quraldardy avtomatty túrde tekserip, ınspektorlardy habardar etý. Eń sońy, geoaqparattyq júıelerdi paıdalana otyryp, avtokólikterdiń jyldamdyǵyn anyqtaıdy.
- Eger álgindeı patrýldik kólikter joldardaǵy (kóshelerdegi) tártipti torýyldaý kezinde arnaıy jaryq sıgnaldaryn qospasa, polıtseı qyzmetkerleri zańdy buzǵan bolyp eseptele me?
- Patrýldik-bekettik qyzmet atqarý nusqaýlyǵyna súıensek, polıtsııa ınspektory tikeleı avtojoldy patrýldeý kezinde jalpyǵa ortaq jol qozǵalysy erejelerin ustanady. Al jol-kólik oqıǵasy týraly shaqyrý nemese habarlama túsken jaǵdaıda, jol qozǵalysynda basymdyq alý úshin kók jáne qyzyl tústi jaryq maıagyn, arnaıy dybys sıgnalyn qosyp qozǵalýy qajet. Kúndizgi mezgilde arnaıy sıgnal jol qozǵalysy erejelerin buzýshylyqty tikeleı anyqtaǵan jaǵdaıda ǵana qoldanylady. Al jol qozǵalysyna qatysýshylardyń jol erejesin buzǵan sátin túsirý kezinde patrýldik kóliktiń jaryq sıgnaly qosylmaı tursa, ol zań buzýshylyq bolyp eseptelmeıdi. Sebebi quqyqbuzýshylyq avtomatty baǵdarlamalyq júıemen anyqtalady.
- Al túngi ýaqytta she?
- Polıtsııa qyzmetkerleriniń patrýldik bekettik qyzmetti atqarýy jónińdegi nusqaýlyqty bekitý týraly QR Іshki ister mınıstriniń 2023 jylǵy 15 aqpandaǵy №164 buıryǵynda táýliktiń qaranǵy ýaqytynda patrýldeý turaqty jaryq sıgnalyn qoldana otyryp júzege asyrylady dep kórsetilgen. Bul buıryqty buzǵan polıtsııa qyzmetkerlerine QR Quqyq qorǵaý qyzmeti týraly zańynyń 57, 58-baptaryna sáıkes shara qoldanylady.
- Ótken jyly oblystaǵy mobıldi keshender neshe zań buzýshylyqty tirkedi?
- 2024 jyly Pavlodar oblysy aýmaǵynda mobıldi keshenderdin kómegimen 35 myńnan astam uıǵarym shyǵarylyp, jalpy somasy 488 mln teńgeden asatyn aıyppul salyndy. Zańbuzýshylyqtyń basym bóligi - jyldamdyqty arttyrý.
- Óńirde «Sergek» júıesine uqsas kameralar ornatý qarastyrylǵan ba? Ol qashan júzege asyrylady?
- Bıyl Pavlodar, Ekibastuz jáne Aqsý qalalarynda, sondaı-aq respýblıkalyq mańyzy bar avtojoldarda zań buzýshylyqtardy tirkeý júıelerin ornatý josparlanǵan. Bul eń áýeli jergilikti atqarý bılikteriniń quzyryndaǵy másele. Oblysta bul boıynsha arnaıy joba qabyldanyp, qarajattar qarastyrylǵan. Jańa júıeler ornatylsa, júrgizýshilerdiń tártibi nyǵaıyp, jol-kólik oqıǵalary azaıa túsedi degen úmittemiz.
- Jol-kólik apattarynyń kóbeıýine kóbine qandaı jaǵdaılar sebep bolyp otyr?
- Júrgizýshilerdiń qarsy baǵytqa shyǵyp ketýi, jyldamdyqty shamadan tys asyrý men jaıaý júrginshilerge jol bermeýi qaıǵyly jaǵdaılarǵa jıi soqtyrýda. Jyl basynan beri oblysymyzda jol-kólik apattarynyń sany 57 paıyzǵa óskeni baıqaldy. Onyń ishinde qaza tapqandardyń sany kóbeıip, zardap shekken adamdardyń úlesi 62 paıyzǵa artqan. Avtojoldarda jyldamdyq rejımin buzǵan 26 myńǵa jýyq júrgizýshi anyqtaldy. Jyldamdyqty arttyrý - aımaq joldarynda eń kóp taralǵan zań buzýshylyqtyń biri. Mysal úshin jaqynda Astana-Pavlodar avtojoly boıynda Haval dargo avtokóligi saǵatyna 207 shaqyrymmen júıtkigeni kameraǵa túsip qaldy. Júrgizýshi 157 280 teńge somasynda aıyppul tóledi. Taǵy bir jaǵdaıda Range Rover avtokóligi ustaldy. Ol saǵatyna 237 shaqyrym jyldamdyqpen júrgen. Kez kelgen shekten tys jyldamdyq jol qozǵalysyna qatysýshylar úshin úlken qaýip tóndiredi. Olardyń barlyǵy jazasyz qalmaıdy. Aıyppuldarǵa jol qozǵalysy erejelerin buzǵany úshin qoldanylatyn ákimshilik shara emes, erejelerdi saqtaýdyń mańyzdylyǵyn, qozǵalysqa qatysýshylardyń ómiri men densaýlyǵyna qurmetpen qaraýdy eske salatyn tártiptik qural retinde qaraǵan durys.
- Áńgimeńizge rahmet!
Eske sala keteıik, Pavlodarǵa «Sergek» kameralary qoıylýy múmkin ekenin jazǵanbyz.
Oblys avtojoldarynda kisi ólimimen aıaqtalǵan kólik apattary jıilegen. Ótken aptada 4 adam qaza tapqan jantúrshigerlik jol apaty tirkeldi.
Al Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy.