Mobıldi aýdarymy nazarǵa ilikkenderge salyq organdarynan qandaı habarlama keledi
ASTANA. KAZINFORM — Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly mobıldi aýdarym sany men mólsheri salyq organdarynyń nazaryn aýdartqan adamdarǵa qandaı habarlama keletinin aıtty.
— 2025 jyldyń 12 qarashasynda Qarjy mınıstriniń buıryǵymen mobıldi aýdarymdardy baqylaýdyń ólshemsharttary bekitildi. Ondaı ólshemshart burynnan bar. Bul joly soǵan kishkene ǵana ózgeris engizdik. Atap aıtsaq, 3 aı qatarynan aı saıyn 100 nemese odan da kóp tulǵadan óziniń jeke shotyna aqsha aýdarymdaryn alsa jáne onyń jıyntyq somasy 1 mln teńgeden assa, málimetteri salyq organdaryna joldanady. Bul jerde shatasýdyń qajeti joq. Aýdarymnyń somasy 1 mln teńgeden assa boldy, mobıldi aýdarym tekseriledi eken degen — jańsaq pikir. Ol múmkin emes. Ólshemsharttyń ekeýi de oryndalýy kerek. Úsh aı qatarynan 100 nemese odan da kóp tulǵadan aqsha aýdarymdary túsý kerek jáne solardyń jalpy somasy 1 mln teńgeden asý kerek, — dedi ol onlaın brıfıngide.
Sondaı-aq, ol 1 mln teńge degen shek nege alynǵanyn túsindirdi.
— Bul jerde biz 1 mln teńge dep túsinikti tilmen aıtyp otyrmyz. Al ólshemshartta eń tómengi 12 jalaqy kóleminde dep bekitilgen. Qazir onyń mólsheri 1 mln teńgege teń. 100 tulǵa degen aýdarym sany emes, aýdarym jasaǵan adam sany. Mundaı ólshemshartqa kásipker emes adamnyń túsýi ekitalaı, — deıdi maman.
Sondaı-aq, ol aýdarym sany men mólsheri artqan adamdarǵa alǵashqy habarlamalar naýryzdyń sońyna qaraı kele bastaýy múmkin ekenin aıtady.
— 31 jeltoqsanǵa deıin kúshinde bolatyn № 323 buıryqta bankter aýdarym týraly derekti bir jyldyń qorytyndysy boıynsha beretin. Al 2026 jyly kúshine enetin Salyq kodeksinde osy merzim «anyqtalǵan sátten bastap» degen uǵymmen almastyryldy. Demek 3 aı qatarynan aýdarym júrip jatqanyn bankter anyqtasa, sol boıda salyq organdaryna joldaıdy. Bankten alǵan málimet boıynsha kameraldyq baqylaý júrgizemiz. Sonyń qorytyndysy boıynsha habarlama jiberemiz. Ol habarlama 1414 nómiri arqyly da, salyq tóleýshiniń kabınetine de jiberiledi. Ol habarlamadaǵy talaptardy oryndaýǵa 30 jumys kúni beriledi, — dedi Ersaıyn Kóptileýuly.
Buǵan deıin Qazaqstanda mobıldi aýdarym erejeleri ózgergenin jazǵan edik.