Mobıldi aýdarymdardy tekserý: 10 qarashadan bastap ne ózgeredi
ASTANA. KAZINFORM — QR Qarjy mınıstrligi mobıldi aýdarymdardyń kásipkerlik qyzmetten túsken tabys belgilerin anyqtaý talaptaryn ózgertti. Jańa ereje 2026 jylǵy 10 qarashadan bastap kúshine enedi.
Buǵan deıin qatarynan úsh aı boıy ár aıda keminde 100 túrli adamnan aqsha túsken bank shottary salyq organdarynyń nazaryn aýdarýy múmkin edi. Ol úshin osy úsh aıda túsken aqshanyń jalpy somasy eń tómengi jalaqynyń 12 eselengen mólsherinen asýy kerek bolatyn.
Endi bul shek 360 aılyq eseptik kórsetkishke (AEK) deıin kóterildi. ıAǵnı 2026 jyly úsh aıda túsken aqshanyń jalpy somasy 1 557 000 teńgeden assa, salyq organdary mundaı aýdarymdarǵa nazar aýdarýy múmkin. Al aqsha jiberýshilerdiń sany men úsh aılyq merzimge qatysty talap ózgergen joq.
Shekti soma ár jyldyń 1 qańtarynda belgilengen AEK mólsherine qaraı esepteledi.
Sonymen qatar Qarjy mınıstrligi ınternet arqyly taýar satatyn kásipkerler týraly málimetterdi berý tártibin naqtylady. Bankter bul aqparatty Smart Data Finance (SDF) tsıfrlyq júıesi arqyly joldaıdy.
Júıede tehnıkalyq aqaý bolsa, málimetterdi ilespe hatpen birge CD-dıskide tapsyrýǵa bolady. Mundaı jaǵdaıda aqparatty berý merzimi bes jumys kúnine uzartylady. Biraq aqaý bolǵanyn Memlekettik kirister komıtetiniń sol kúni jarııalaǵan baspasóz habarlamasy rastaýǵa tıis.
Jeke tulǵalardyń bank shottaryna túsken aqshanyń jalpy somasy týraly málimetterdi berý kezinde de osy tártip qoldanylady.
Eske salaıyq, 2026 jylǵy 1 qańtardan bastap Qazaqstan bankteri jeke tulǵalardyń mobıldi aýdarymdary týraly málimetterdi Memlekettik kirister komıtetine toqsan saıyn joldaı bastady.
Al mamyr aıynda azamattarǵa salyq organdarynan habarlamalar kele bastady. Bul rette habarlama alǵany úshin salyq tóleýshilerge birden aıyppul salynbaıdy. Qazaqstandyqtar anyqtalǵan sáıkessizdikterdiń sebebin túsindirip, tıisti málimetterdi aldaǵy deklaratsııalarynda kórsete alady.
