Mobıldi aýdarymdar týraly alǵashqy derekter sáýir aıynda beriledi
ASTANA. KAZINFORM — 2026 jylǵy 15 sáýirge deıin, birinshi toqsannyń qorytyndysy boıynsha mobıldi aýdarymdar jónindegi bankter aqparaty salyq organdaryna túse bastaıdy.
Memlekettik kirister komıtetiniń arnaıy salyq rejımderin ákimshilendirý basqarmasynyń basshysy Erqanat Shynbergenniń aıtýynsha, monıtorıng birneshe sharttyń jıyntyǵy boıynsha júrgiziledi.
— Jeke shottarǵa túsken barlyq túsimderdi bankter baqylaıdy. Úsh aı qatarynan 100 jáne odan da kóp ártúrli tulǵadan aýdarym tússe jáne osy úsh aıdaǵy jalpy túsim somasy 1 mıllıon teńgeden assa, bankter salyq organdaryna habar beredi, — dedi Erqanat Shynbergen elordada ótken baspasóz máslıhatynda.
Sonymen birge, onyń aıtýynsha, eger shot tek jeke maqsattarda paıdalanylsa, muny dáleldeýge bolady.
— Biz birden shara qoldanbaımyz: aldymen taldaý júrgizemiz, jeke kásipker retinde tirkelýiniń bar-joǵyn, salyqtardyń tolyq tólenýin qaraımyz. Sondaı-aq kameralyq baqylaý nátıjeleri boıynsha habarlamalar arqyly shara qabyldaımyz. ıAǵnı osy habarlama aıasynda salyq tóleýshi túsinikteme berip, shottardyń kásipkerlik qyzmetke emes, jeke qajettilikterge paıdalanylǵanyn rastaýǵa quqyly, — dep atap ótti MKK ókili.
Eger aýdarymdardyń kásipkerlik qyzmet aıasynda alynǵany rastalsa, salyq tóleýshige qosymsha salyq esebin tapsyrý qajet bolady. Al jeke kásipker retinde tirkelmegen jaǵdaıda, ony zańda belgilengen tártippen rásimdeýi tıis.
Oǵan qosa Memlekettik kirister komıteti belgilengen talaptarǵa saı kelýdiń ózi bank shottaryn birden buǵattaýǵa sebep bolmaıtynyn aıtyp otyr. Shot boıynsha shyǵys operatsııalary tek salyq organdary jibergen habarlama oryndalmaǵan jaǵdaıda ǵana jáne Salyq kodeksinde kórsetilgen tártippen shektelýi múmkin.
Eske sala keteıik, jeke tulǵalardy tekserý úsh alǵyshart toǵysqan jaǵdaıda júrgizilýi múmkin:
— 100 jáne odan da kóp ártúrli tulǵadan aýdarymdardyń túsýi;
— úsh aı qatarynan mundaı túsimderdiń turaqty bolýy;
— aýdarymdardyń jalpy somasynyń eń tómengi jalaqynyń 12 eselengen mólsherinen, ıaǵnı 1 020 000 teńgeden asýy.
Buǵan deıin Erqanat Shynbergen arnaýly salyq rejımin qoldanǵysy kelgen kásipkerler 1 naýryzǵa deıin salyq rejımi týraly habarlama jiberýi keregin aıtqan edi.