Mobıldi aýdarymdar: Kásipkerdiń týǵan kúnine aýdarylǵan qarajat tekserile me

ASTANA. KAZINFORM – Qarjy vıtse-mınıstri Erjan Birjanov Qazaqstanda mobıldi aýdarymdardy tekserý normasyna qatysty túsinik berdi.

Búgin Úkimet otyrysynan keıingi baspasóz máslıhatynda: «ujymda jınalatyn qarajat nemese toı ıesiniń shotyna túsken qarajat tolyq baqylaýda bola ma? Bul jaǵdaıda jeke kásipker retinde tirkelgen osy adamdar qalaı tekseriledi?» degen suraq qoıyldy. 

- Zańda barlyq norma jazylǵan, erejeni Ulttyq bank qabyldady. Osy oraıda 15 sáýirge deıin bekitilgen talaptar boıynsha bankterden birinshi toqsannyń málimetterin alamyz. Suraqta qoıylǵan aýdarymdarǵa qatysty máselede tekserý bolmaıdy, ıaǵnı ony bıznes protseske jatqyzbaımyz. Týǵan kúnge nemese osy sııaqty basqa is-sharalarǵa jınalǵan qarajat baqylaýǵa jatpaıdy. Bıznes aýdarym bolmasa, bul protsesten Qazaqstannyń eshbir azamatyna zalal kelmeıdi, - dedi E. Birjanov tilshiler suraǵyna jaýap bere otyryp.

Onyń aıtýynsha, bir adamda jeke kásipkerligine arnalǵan jáne jeke ózine baılanǵan bank kartasy bolady.

- Bul adam jeke kásipker bola tura, onyń jeke kartasyna týǵan kúnine oraı jan-jaqtan qarajat aýdarylsa, muny kásipkerlik retinde sanamaımyz, - dedi vıtse-mınıstr.

Buǵan deıin habarlanǵandaı, Qazaqstanda mobıldi aýdarymdardy tekserý bastaldy. 

Bul protsess 15 sáýirge deıin jalǵasady. Kirister komıteti jyl basynan beri kásipti zańdastyryp, salyq esebin tapsyrýǵa úndep kelgen. Erejege sáıkes, jalpy somasy 1 mln teńgeden asatyn jáne 3 aı qatarynan 100-den astam aýdarym qabyldaǵan azamattar tekserýge alynady. Endi bankter bergen málimetterdiń nátıjesinde eskertýdi elemegenderge habarlama jiberiledi. Biraq birden aıyppul salynbaıdy. 30 kúnniń ishinde qarjynyń qaıdan kelgenin túsindirýińiz kerek. Qarajattyń bızneske qatysy joq ekeni dáleldense, baqylaýdan bosatylady. Al eskertýdi elemegender shotyna túsken qarjynyń 10 paıyzyn salyq retinde tóleýge mindetti.