Mobıldi aýdarym shegi 1 mln teńge: qazaqstandyqtarǵa alańdaýǵa sebep bar ma

ASTANA. KAZINFORM — Qarjy vıtse-mınıstri Dáýren Keńbeıil mobıldi aýdarymdar boıynsha 1 mıllıon teńge shekteý qoıý týraly bastamaǵa qatysty túsinik berdi.

Onyń aıtýynsha, áńgime úsh aı ishindegi mobıldi aýdarymdardyń jıyntyq somasyna qatysty bolyp otyr.

— Bul kórsetkish Memlekettik kirister komıteti tarapynan reprezentatıvti derekter negizinde qalyptastyryldy. Áriptester bul somany qaýipsiz deńgeı dep sanaıdy. Sheshim aldyn ala ekonomıkalyq saıasat jónindegi keńeste maquldandy. Biraq, sheshim áli de talqylanyp jatyr, — dedi Dáýren Keńbeıil Úkimet otyrysynan keıin ótken baspasóz máslıhatynda.

Sondaı-aq BAQ ókilderi qarjy vıtse-mınıstrinen azamattar turaqty túrde týystarynan aýdarym alyp otyrsa, ne isteý kerek ekenin surady.

— Eger siz kásipker bolmasańyz jáne aýdarymnyń týystaryńyzdan túskenin túsindire alsańyz, eshqandaı suraq týyndamaıdy. Bul shekteý júıeli túrde, onyń ishinde bıznes aıasyndaǵy aýdarymdarǵa qatysty. Eger qarajattyń kásipkerlik qyzmetke qatysy joq ekenin rastaı alsańyz, másele joq, — dep túsindirdi mınıstrdiń orynbasary.

Osy oraıda Dáýren Keńbeıil bıznes ókilderine mobıldi aýdarym boıynsha 1 mln teńge shegin belgileýdegi bastamanyń maqsaty — kóleńkeli tabys kózderin zańdastyrý jáne adal kásipkerlerdi qorǵaý ekenin atap ótti.

Jyl basynda Memlekettik kirister komıteti mobıldi aýdarymdarǵa qatysty, jasyryn tabys erteli-kesh anyqtalatynyn habarlaǵan edi. 

Eske salsaq, Májilis depýtaty Azat Perýashev mobıldi aýdarymdardyń shegin 255 myńnan 1 mln teńge kóterýdi usyndy.