Mobıldi aýdarym boıynsha salyqtan jaltarǵandardyń bereshegi qalaı óndiriledi
ASTANA. KAZINFORM — Qarjy vıtse-mınıstri Erjan Birjanov 2026 jyldyń 1 qańtarynan mobıldi aýdarym boıynsha salyqtan jaltarǵandardyń bereshegi qalaı óndiriletinin túsindirdi.
- Mobıldy aýdarym týraly buıryqqa ózgerister engizdik. Ózderińiz bilesizder, 2026 jyldyń 1 qańtaryna deıingi erejede 2 faktor boıynsha tekserý júrgiziletin edi. ıaǵnı, ártúrli 100 adamnan 3 aı qatarynan aýdarym alsa, biz onda muny kásipkerlik retinde qarastyrǵan bolatynbyz. Biraq, osyny iske asyrǵan kezde usynystar kóp tústi. Máselen, aýdarym somasy az, 100, 200 teńgeden aýdarym bolatyny, somanyń mólsherin kórsetý kerektigi aıtyldy. Sondyqtan úshinshi kórsetkish engizdik. Onyń somasy - 12 AEK. ıAǵnı, 1 mln-nan asyp túsýi tıis. Osy krıterıı sáıkes bolǵanda ǵana aýdarymdardy baqylaýǵa alamyz, - dedi ol Úkimet otyrysynan keıingi brıfıngte.
Onyń túsindirýinshe, bir adamnyń shotyna 5 mln, 10 mln teńge 2-3 adamnan tússe, onda ol baqylaýǵa alynbaıdy. Nemese qańtarda aýdarym alyp, aqpanda aýdarym almasa ondaı da esepshottar baqylanbaıdy. ıAǵnı, 3 aı - qańtar, aqpan, naýryz aılarynda aqsha qatarynan túsýi kerek.
- Biz jeke azamattardyń shottaryn buǵattamaımyz. Habarlama beremiz. Osydan keıin túsinikteme berip, ony qabyldaǵanda shara qoldanylmaıdy. Birden shekteý sharasyn qoldanbaımyz. Tek salyqtyq tekserý arqyly ǵana shara qoldanamyz, - dedi Erjan Birjanov.
Vıtse-mınıstrdiń aıtýynsha, jeke tulǵa habarlamany eskermegen jaǵdaıda salyqtyq tekserý júrgiziledi.
- Bankterden derekterdi alyp, qaı adamnan, qandaı jaǵdaıda aqsha túskenin tekseremiz. Eger salyqtan jaltarýdy baıqasaq, oǵan salyq mindettemelerin óteýdi talap etemiz. Ony ýaqytyly tóleýi tıis. Ol azamat bizben kelispeı, sot arqyly sheshimdi qaıta qaraýy múmkin. Eger sotqa júginbese, onda salyqty óndirip alý sharalaryn qoldanamyz. Jeke sot oryndaýshylaryna sol azamat týraly málimetterdi beremiz. Salyqty sot oryndaýshylary arqyly óndirip alamyz. Banktiń shottary buǵattalmaıdy, - dedi vıtse-mınıstr.
Buǵan deıin 2026 jyldyń qańtarynan bastap mobıldi aýdarymdarǵa qatysty jańa talaptar engiziletinin jazǵan edik.