Mobıldi qosymsha jasaýdy kásip etken jastar kóbeıip keledi
ASTANA. QazAqparat - Mobıldi qosymshalar naryǵy álem boıynsha ǵalamat qarqynmen damyp jatyr. Qosymshalar jasaý úlken qarajat ákeletin shyǵyny az startaptardyń biri. Barlyǵymyz da Clash of Clans oınyn jasap, álemdik tanymaldylyqqa ıe bolǵan Supercell fınlıandııalyq startaptyń jetken keremet jetistikterin bilemiz. Nebári alty adamnan turatyn kompanııa úsh jylda 3 mlrd. AQSh dollary turatyn alyp kompanııaǵa aınaldy. Supercell kompanııasy jarnamadan tys kún saıyn Clash of Clans oıyny barysynda bolatyn usaq satyp alýlardan 5 mıllıon dollar paıda kórip otyrdy. Qazaqstanda ondaı jetistikke jetý neǵaıbyl dep aıtýlaryńyz múmkin, degenmen qazaqstandyq mamandar otandyq naryqtyń da áleýeti zor dep otyr. «QazAqparat» agenttigi osy salanyń maıyn ishken sarapshylarmen tildesip kórgen bolatyn.
Zero To One Labs & nFactorial Incubator kompanııasynyń negizin qalaýshy Arman Súleımenov Qazaqstanda álemdik deńgeıdegi 10 myń baǵdarlamashyny daıyndap, jahan boıynsha mıllıondaǵan tutynýshy qoldanatyn mobıldi ónimderdi shyǵarýdy maqsat etip otyr. 2015 jyldyń mamyr aıynan bastap, Armannyń kompanııasy 110-ǵa tarta mobıldi qosymsha jasady jáne 200-ge tarta ınjener men dızaıner daıyndap shyqqan («Intellection» kompanııasymen birge).
«Qazirgi ýaqytta meniń komandamda 20 adam bar. Ózim baǵdarlama jasaqtaýǵa jıi aralasa bermeımin, eń alǵashqy qadamymdy 15 jasta jeke saıttarymdy jasaýdan bastaǵanmyn», - deıdi ol.
Onyń sózinshe, iOS jáne Android platformasynda bir qosymsha jasaý úshin 21 myń AQSh dollary ketedi.
«Meniń komandamda bir qosymshany 7 adam 3 aı boıy jasaıdy. Olardyń ortasha jalaqysy 1 myń AQSh dollary ekenin eskersek, bir qosymshany iOS jáne Android platformasynda jasaýǵa 21 myń dollar shyǵyndalady», - deıdi Arman Súleımenov.
Búginde Arman óz komandasymen birge eki jobany qolǵa alyp otyr. Birinshisi - nFactorial Incubator dep atalady, onyń aıasynda jas baǵdarlamashylar AQSh-taǵy ataqty Kremnıı alabynda 12 aptalyq jazǵy mektepten ótip, App Store/Play Market platformalarynda óz ónimderin jasaýǵa múmkindik alady.
Ekinshisi - Imbra qosymshasy. Ol kez kelgen adamnyń tanymal qazaqstandyq jáne reseılik juldyzdardan beıne-quttyqtaý alýyna múmkindik beredi. Resmı iske qosylǵan kúnnen beri, 4 aıdyń ishinde qosymsha arqyly , 1,3 mıllıon teńgege 92 beıne-quttyqtaý joldanǵan. Qosymsha sátti iske qosyldy dese de bolady. 70-ke tarta juldyz jazylǵan. Reseılik naryqqa shyǵýǵa alǵashqy qadam jasaldy - Aleksandr Revva qosymshaǵa jazyldy.
Degenmen otandyq jasaqtaýshylar qosymshalaryn monetızatsııadan ótkizýdi oılap ta júrgen joq.
«Biz belgili bir ónimnen aqsha tabý maqsatyn naqty qoıǵan emespiz, biz biregeı ári qyzyq dúnıe jasaǵymyz keledi. Ázirge biz aýdıtorııany ózimizge qaratyp jatyrmyz. Bul biraq qosymshadan paıda kórýge bolmaıdy degen sóz emes. Barsha álemde osy saladan qyrýar aqsha taýyp jatyr, Qazaqstan da solardyń qatarynda», - deıdi «Intellection» kompanııasynyń jetekshisi Baqytjan Baıjıkenov.
Baqytjan Baıjıkenov - ınformatıkadan halyqaralyq olımpıadalardyń birneshe dúrkin júldegeri. Ol Kremnıı alabynda, álemge tanymal imo.im kompanııasynda qyzmet etti. Atalmysh kompanııa imo atty beınekonferents-messendjer qosymshasyn jasap, úlken jetistikke jetken.
«Men álemdik deńgeıdegi IT-kompanııalarda úlken tájirıbe ala otyryp, men Qazaqstanǵa oralýdy, óz elimde otandyq IT-ındýstrııany damytýdy armandadym. Qazaqstanda úlken áleýet baryna senemin. Bizdiń elde talantty jastar jeterlik», - dep esepteıdi ol.
Onyń kompanııasy jasaqtaǵan qosymshalar adamdarǵa túski as pen bıznes-lanchtarǵa tapsyrys berýge, Qazaqstan jańalyqtaryn oqyp, qazaq tilin meńgerýge múmkindik beredi.
Sonymen qatar, «Intellection» - bul aǵartýshylyq joba. Onyń stýdentteri 150-den astam mobıldi qosymsha jasap shyqty. Keıbir oqýshylar óziniń jeke bıznesin ashty. Keıbiri oqytýdan soń, jumysqa ornalasty.
«Mobıldi qosymsha jasaqtaýdy kóp adam úırengisi keledi. Bizge túrli tájirıbeleri bar adamdar keledi. Olardyń biri tipti eshteńe bilmeıtin bolsa, ekinshisi osy salanyń kásibı sheberi. Bizdiń oqýshylar úshin bul óz kásibin ózgertýge, mobıldi qosymsha jasaqtaýshysy bolyp qaıta mamandanýǵa jáne biliktiligin joǵarylatýǵa jaqsy múmkindik», - deıdi Baqytjan Baıjıkenov.
App Annie boljamy boıynsha, 2017 jyly mobıldi qosymshalarǵa ketetin jalpy shyǵyn 166 mlrd. dollar bolady dep kútilýde. Tutynýshylar mobıldi qosymshalar dúkenderinde jalpy kólemi 65 mlrd. teńge qaldyrmaq. Mobıldi oıyndar kiristiń negizgi bóligin alady dep boljanýda. Degenmen mýltımedıa almasý qosymshalarynyń qarqyny jyldamyraq ósedi.
