Mobıldi qosymsha arqyly halyq sanaǵynan ótýge bolady

NUR-SULTAN. QazAqparat - Elordada 2021 jylǵy ulttyq halyq sanaǵyn ótkizýdiń daıyndyq kezeńi bastaldy. Qazirgi sanaqtyń erekshelikteri men jańalyqtary týraly onlaın-brıfıng kezinde Nur-Sultan qalasy boıynsha Ulttyq statıstıka bıýrosy departamentiniń basshysy Jorabek Dáýrenov aıtyp berdi, dep habarlaıdy qalalyq ákimdiktiń resmı saıty.

Qazaqstanda halyq sanaǵy ár 10 jyl saıyn júrgiziledi. Onyń maqsaty – sońǵy 10 jylda oryn alǵan (sanaqaralyq kezeń) demografııalyq, ekonomıkalyq jáne áleýmettik úrdister týraly naqty rastalǵan aqparat alý.

«Osyǵan baılanysty halyqtyń bilim deńgeıi, neke-otbasylyq qurylymy, turǵyn úı jaǵdaılary, úılerdiń abattandyrylýy, elimizdiń etno-lıngvıstıkalyq quramy jáne qoǵam talap etetin basqa da ózekti derekter sekildi málimetter tek jalpyǵa birdeı sanaq kezinde ǵana alynýy múmkin. Aldaǵy sanaq qorytyndylary memlekettik organdardyń qazirgi derekter bazasyn ózektendirý úshin jańartylǵan jáne rastalǵan aqparat alyp keledi.

Elorda aýqymdy is-shara – kezekti ulttyq halyq sanaǵyn ótkizýge daıyndalýdyń aıaqtalý kezeńine taıap qaldy. Qala ekonomıkasynyń damýy jáne bıýdjetti josparlaý úshin qajet bolatyn sanaq qorytyndylary boıynsha jınalǵan aqparattyń sapasy elordalyqtarǵa, olardyń bul sharaǵa barynsha kóp tartylýyna tikeleı baılanysty», - deıdi Jorabek Dáýrenov.

Sanaqty ótkizýdiń birinshi daıyndyq kezeńi 2021 jylǵy 1-30 maýsym aralyǵynda ótedi. Bul kezeńde sanaq qyzmetkerleri turǵyn jáne turǵyn emes úı-jaılardy tirkeý boıynsha jáne onda turatyn halyq sanyn naqtylaý maqsatynda jumystar júrgizedi.

«2021 jylǵy ulttyq sanaqtyń basty jańashyldyǵy 2021 jylǵy 1 qyrkúıek pen 15 qazan aralyǵynda elimizdiń árbir turǵyny sanaq.gov.kz saıtynda onlaın rejımde ózdiginen saýalnama paraqtaryn toltyrý múmkindigi bolady. Júıe táýligine 24 saǵat qoljetimdi bolady. Respondent sanaqqa qatysýy úshin ózine barynsha yńǵaıly ýaqytty tańdaýyna bolady, sondaı-aq saıtta blank toltyrýdy toqtatyp, keıinnen jalǵastyrý múmkindigi de iske asyrylady. Odan basqa, egov.kz elektrondy úkimet platformasynda elektrondy tsıfrlyq qoltańba (ETsQ) arqyly sanaq ótýge bolatyn sanaq.gov.kz saıtynyń qosymsha beti ornalastyrylady. Mobıldi azamattar úshin «Aitu» mobıldi qosymshasy arqyly sanaqtan ótý múmkindigi bolady», - deıdi ol.

Dástúrli jappaı aralaý 2021 jylǵy 1 jáne 30 qazan aralyǵynda ótedi jáne ol belgilengen merzimde onlaın rejımde sanaqtan ótpegen respondentter úshin ótkiziledi. Dástúrli kezeńniń jańashyldyǵy ıntervıýerlerdiń elektrondy planshetterdi paıdalanýy kiretin zamanaýı tsıfrlyq tehnologııalardyń enýi men úrdisterdiń avtomattandyrylýy bolady.

Bul adam faktorynyń derekter sapasyna áserin yqshamdaýǵa, JSN qoldanyp halyq sanaǵy derekteri durystyǵynyń deńgeıin arttyrýǵa múmkindik beredi.