Mobbıngke ushyraǵan adam ne isteýi kerek — psıholog keńesi
ASTANA. KAZINFORM — Jumys ornyndaǵy psıhologııalyq qysym adamnyń kásibı qyzmetine ǵana emes, emotsıonaldyq jaǵdaıyna da áser etedi. Ádeıi elemeý, kópshilik aldynda kemsitý, orynsyz syn aıtý nemese ujymnan shettetý ýaqyt óte kele kúızeliske jáne ózine degen senimniń tómendeýine ákelýi múmkin.
Psıholog Anargúl Ibraımbekova mobbıngke ushyraǵan adam ne isteýi keregin aıtyp berdi.
— Eń aldymen, bolyp jatqan jaǵdaıdy durys baǵalaý kerek. Bul bir rettik túsinispeýshilik pe, álde júıeli túrde qaıtalanyp júrgen mobbıng pe — sony anyqtap alǵan jón. Eger múmkindik bolsa, qysym kórsetken adammen sabyrly túrde sóılesip, máseleni ashyq talqylaýǵa tyrysqan durys. Óz oıyńyzdy naqty jetkizýden qoryqpańyz. Kóp jaǵdaıda adamdar qorqynyshtan nemese uıattan úndemeı júredi. Biraq únsizdik máseleni sheshpeıdi. Eger qysym jalǵasa berse, basshylyqqa nemese HR bólimine júginip, qajet bolǵan jaǵdaıda zańgerdiń ne quqyq qorǵaý organdarynyń kómegine júgingen durys, — dedi psıholog.
Mamannyń aıtýynsha, mobbıng árdaıym ashyq janjal túrinde kórine bermeıdi. Ol qyzmetkerdi mańyzdy aqparattan ádeıi shettetý, kásibı qabiletin negizsiz synaý, oryndalmaıtyn tapsyrmalar berý nemese ujymnan oqshaýlaý arqyly da baıqalýy múmkin. Sońǵy jyldary mundaı qysymnyń tsıfrlyq túri de jıilep keledi.
— Dıdjıtal-mobbıng áleýmettik jelilerde nemese jumys chattarynda qorlaıtyn pikir jazý, jalǵan aqparat taratý, adamdy ádeıi elemeý sııaqty áreketter arqyly kórinedi. Eger mundaı jaǵdaı bolsa, qorlaıtyn habarlamalardyń skrınshottaryn saqtap qoıǵan jón. Bul qajet bolǵan jaǵdaıda dálel retinde paıdalanylýy múmkin. Sondaı-aq qorlaıtyn akkaýnttardy buǵattap, áleýmettik jeli ákimshiligine shaǵymdanýǵa bolady. Al qysym júıeli túrde jalǵassa, uıym basshylyǵyna nemese quqyq qorǵaý organdaryna júgingen durys, — dedi Anargúl Ibraımbekova.
Psıhologtyń sózinshe, qysymǵa ushyraǵan adam eń aldymen óziniń psıhologııalyq turaqtylyǵyn saqtaýǵa kóńil bólýi kerek.
— Stresti basqarýdy úırený, jetkilikti uıyqtaý, jaqyn adamdardyń qoldaýyna súıený jáne óz pikirińizdi ashyq jetkizý mańyzdy. Mobbıngti jeńý úshin únsiz qalmaǵan durys. Der kezinde kómek surap, máseleni zańdy ári mádenı jolmen sheshýge umtylý — psıhologııalyq densaýlyqty saqtaýdyń mańyzdy qadamdarynyń biri, — dep túıindedi psıholog.
Buǵan deıin Kazinform agenttigi onlaın-grýmıngten saqtaný joldary týraly psıhologtyń keńesterin jarııalaǵan bolatyn.
