«Mob Fest» jobasy: Elimizdiń eń úzdik 20 mobılografy anyqtalady

ASTANA. QazAqparat - «MOB FEST» Qazaqstan mobılograftary respýblıkalyq festıvaliniń II kezeńine ótken 100 qatysýshy irikteldi, dep habarlaıdy QazAqparat daraqory.kz saıtyna silteme jasap.

Baıqaýdyń I kezeńi 2022 jyldyń 1 qyrkúıeginen bastap, 2023 jyldyń 1 sáýirine deıin onlaın rejımde ótti. Festıvalge 7 524 mobılograf qatysyp, baıqaý talabyna saı, berilgen taqyryptar boıynsha 1 537 vıdeo tirkeldi.
Tirkelgen týyndylar ishinen 100 jumystyń avtory II kezeńge joldama aldy. Alǵashqy synnan súrinbeı ótken 100 qatysýshyǵa qorytyndy kezeńde arnaıy tapsyrma beriledi. Olardyń jumysyn medıa jáne kıno salasynyń mamandarynan quralǵan qazylar alqasy baǵalap, respýblıkalyq festıvaldiń 20 jeńimpazyn anyqtaıdy.
Qazaqstan Respýblıkasy Prezıdenti janyndaǵy «Dara» daryndylardy qoldaý qorynyń «Mob Fest» jobasy daryndy jastardy qoldaýǵa, kreatıvti medıa ındýstrııa ókilderiniń shyǵarmashylyq qabiletin shyńdaýǵa baǵyttalǵan.