«MOB FEST» jeńimpazdary marapattaldy: 20 qazaq balasy Nıý-Iork kıno óneri akademııasynda taǵylymdamadan ótedi
Marapattaý rásimine QR Prezıdenti janyndaǵy «Dara» daryndylardy qoldaý qorynyń prezıdenti Nurlan Qoıanbaev, «Mob Fest» festıvaliniń ambassadory Ashat Shynalıev jáne QR Prezıdenti Teleradıokesheniniń kreatıv dırektory Ásel Tursynǵazına qatysty. Sondaı-aq arnaıy shaqyrylǵan qonaqtar qatarynda belgili qazaqstandyq blogerler, ánshiler, tanymal akterler men óner sheberleri de bolyp, jastarǵa qoldaý bildirdi, aqjarma tilekterin aıtty.
Saltanatty sharada «Dara» qorynyń prezıdenti Nurlan Qoıanbaev mobılograftar festıvali elimizde respýblıkalyq deńgeıde alǵash ret ótip jatqanyn aıtty. Sondaı-aq qordyń negizgi mıssııasy elimizdiń túkpir-túkpirindegi daryndy jastardy qoldaý ekenin atap ótti.
«Festıvalge 7,5 myń adam qatysady dep oılaǵan joqpyn. Vıdeolardy kórip, rıza boldym. Aýyldan shyqqan nebir talantty jastar bar eken. Jalpy, biz buǵan deıin Amerıkaǵa baryp, Nıý-Iork kıno akademııasynyń rektorymen kezdesip, jastarymyzdy sonda oqytý týraly oıymyzdy aıtqan edik. Olar qarsy bolǵan joq. Endi jastarymyz Amerıkada bilim alyp, ózderine tájirıbe jınaıtyn boldy. Jastardyń arasynan myqty mamandar shyǵady dep senemiz», - dedi Nurlan Qoıanbaev.
Ol mundaı festıvalderdiń elimizde kóp bolǵany durys ekenin de alǵa tartty.
«Biz byltyr «Tartyl fest» festıvalin ótkizgen edik. Al mobılografııaǵa keler bolsaq, ol mádenıetke, trendtegi tyń ónerge jatady. Sondyqtan da jyl saıyn ótkizip turǵan durys dep oılaımyn. El ishindegi ónerli jastarǵa óte kóp kóńil bólý kerek. Solar eldiń ataǵyn álemge shyǵarady», - dedi N.Qoıanbaev.
Sonymen qatar, QR Prezıdenti Teleradıokesheniniń kreatıv dırektory, «MOB FEST» festıvaliniń qazylar alqasynyń múshesi Ásel Tursynǵazınanyń aıtýynsha, QR Prezıdenti janyndaǵy «Dara» daryndylardy qoldaý qory talantty jastarǵa zor múmkindik jasaýda.
«Myńnan tulpar atanǵan 100 júırik qorytyndy kezeńge baryn salypty, barlyq jumys birinen-biri ótedi. Baıqaý óte joǵary deńgeıde ótti. Jastardyń óresi bıik, oıy tereń ekenin baıqadyq. Qatysýshylardyń deni búgingi qoǵamnyń ózekti máselelerin kótergen. Túsirilim sapasy jaǵynan da keremet jumystardy kórip, tánti boldyq. Bastysy, jastardyń talaby zor», - dedi Ásel Tursynǵazına.
Al «Mob Fest» festıvaliniń ambassadory Ashat Shynalıev festıval arqyly talantty, kreatıv jastarǵa múmkindik berip, jolyn ashý ekendigin atap ótti.
«Baıqaýǵa qatysqan vıdeolar óte tamasha, sapaly túsirilgen. Іriktep alý qıynǵa soqty. Baıqaýǵa qatysýshylardyń jastary 15-40 jas arasynda. Olar ár salada jumys isteıtin azamattar, árqaısysy ónerli jandar. Qazir kóptegen bıznes vıdeo kontent arqyly damıdy. Sondyqtan da, búgin baq synap otyrǵan osyndaǵy árbir talantty jastyń bolashaǵy zor dep oılaımyn», - dedi Ashat Shynalıev.
Eske salaıyq, QR Prezıdenti janyndaǵy «Dara» daryndylardy qoldaý qory uıymdastyrǵan festıvalge 16 men 40 jas aralyǵyndaǵy 7 524 qazaqstandyq mobılograf qatysty.
Festıvaldiń І kezeńi 2022 jyldyń 1 qyrkúıegi men 2023 jyldyń 1 sáýiri aralyǵynda onlaın rejımde ótti. Baıqaýǵa «Mádenıet pen salt-dástúr», «Týrızm», «Adamdar» taqyryptary boıynsha 1537 jumys qabyldandy.
Baıqaýdyń І kezeńiniń qorytyndysy boıynsha 100 úzdik mobılograf anyqtaldy. Olar ekinshi, qorytyndy kezeńniń tapsyrmalaryn oryndaýdy jalǵastyrdy.
Jeńimpazdar esimi www.daraqory.kz, www.infom.kz saıttarynda jarııalandy.
Baıqaýdyń ІІ kezeńiniń jeńimpazdary, ıaǵnı 20 úzdik jumys avtorlary Nıý-Iork kıno óneri akademııasynda (NYFA) taǵylymdamadan ótýge joldama aldy. 40 jeńimpaz aqshalaı syılyqpen marapattalsa, 40 qatysýshyǵa «Mobılografııa PRO» kýrsyn onlaın oqýǵa múmkindik berildi.
Festıvalge qatysýshylardyń biri 20 jastaǵy Sanjar Meıirmanov Qazaqstanda mobılografııa óte jaqsy damyp keledi dep sanaıdy. Onyń osy salada júrgenine úshinshi jyl boldy, sondaı-aq Qonaev qalasynda óziniń agenttigin ashyp, shákirtter tárbıeleýde.
«Men buǵan deıin barber bolǵanmyn, biraq ol jumystan lázzat alǵan joqpyn. Keıin mobılograf bolamyn dep sheshtim. Ártúrli elderde bilim aldym, biliktiligimdi arttyrdym. Bul óte qyzyq sala. Qazirgi tańda birqatar memlekettiń ókilderimen áriptestik ornatqanmyn, búginge deıin alty memlekette bolyppyn. Men negizi kommertsııalyq tapsyrystardy, Reals-ter túsiremin. Bir baıqaǵanym, shetelde mobılografııa qatty damymaǵan eken, al Qazaqstanda damýǵa mine, úlken qadam basyp jatyr. Mobılografııa – ol damýǵa bastaıtyn jol, shyǵarmashylyq erkindik, kreatıv, munda qolynda telefon bolsa bolǵany, vıdeo túsirip, adamdarǵa jaqsy kóńil-kúı syılaısyń. Búgingi festıval elimizdiń jastary úshin ózin kórsetýge jaqsy múmkindik dep sanaımyn», - dedi Sanjar Meıirmanov.
Aıta keteıik, Qazaqstan Respýblıkasy Prezıdentiniń janyndaǵy «Dara» daryndylardy qoldaý qory talantty jastardy qoldaýǵa, olardyń shyǵarmashylyq áleýetin júzege asyrýǵa jáne Qazaqstandaǵy kreatıvti ındýstrııany damytýǵa baǵyttalǵan.
