Qýyqasty bezi obyryn radıoızotoptyq dıagnostıkalaıtyn biregeı tehnologııa iske qosyldy
ASTANA. KAZINFORM – QR Prezıdenti Іs basqarmasy Medıtsınalyq ortalyǵy aýrýhanasynyń ıAdrolyq medıtsına ortalyǵy jańa býyn radıofarmatsevtıkalyq preparaty – 18F-PSMA kómegimen PET/KT zertteýlerin júrgizýge arnalǵan radıoızotoptyq dıagnostıkanyń biregeı tehnologııasyn iske qosqanyn habarlady.
18F-PSMA (ftor-18-prostatospetsıfıkalyq membranalyq antıgen) – qýyqasty beziniń alǵashqy jáne qaıtalama obyryn, sondaı-aq onyń metastazdaryn joǵary dáldikpen anyqtaýǵa arnalǵan ınnovatsııalyq dıagnostıkalyq preparat. Ol qýyqasty bezi obyryna kúdik týyndaǵan naýqastarǵa prostatspetsıfıkalyq antıgen deńgeıi joǵarylaǵan kezde, dıagnozy rastalǵan patsıentterge aýrýdyń satysy men taralý aýqymyn baǵalaý úshin, sondaı-aq retsıdıvke kúdik bolǵan jaǵdaıda, radıonýklıdtik terapııaǵa nemese hırýrgııalyq aralasýǵa daıyndyq barysynda usynylady.
Qazaqstanda alǵash ret tsıklotron tehnologııasy negizinde sıntezdelgen PSMA-preparat klınıkalyq tájirıbege resmı túrde engizildi.
– 18F-PSMA tehnologııasyn engizý – otandyq onkoýrologııa men ıadrolyq medıtsına salasy úshin úlken ilgerileý dep bilemin. Bul jańa ádis qaterli isikti erte satysynda anyqtaýǵa, emdi jekeleı tańdap, naýqastardyń oń nátıjege qol jetkizý úmitin arttyrýǵa múmkindik beredi. Bul – qazaqstandyq medıtsınanyń onkologııalyq aýrýlarǵa qarsy kúreste dáldikke, tehnologııalylyqqa jáne jekelendirilgen tásilge negizdelip, jańa deńgeıge shyqqanyn bildiredi, – dep atap ótti MOA ıAdrolyq medıtsına ortalyǵynyń jetekshisi Aıgúl Sádýaqasova.
Mamandardyń aıtýynsha, bul preparattyń birqatar artyqshylyǵy bar: isikterdi erte anyqtaýda asa mańyzdy sanalatyn keskinniń aıqyndylyǵy men kontrasty joǵary, molekýlalyq quramy turaqty, bul dıagnostıka nátıjesine senim uıalatady, sondaı-aq jartylaı ydyraý merzimi uzaq (110 mınýt). Munyń barlyǵy onyń qoldaný aıasyn keńeıtip, bir kúnde kóbirek naýqasty tekserýden ótkizýge múmkindik beredi.
Bul preparat ıAdrolyq medıtsına ortalyǵynyń tsıklotrondy-óndiristik joǵary tehnologııalyq keshendi bazasynda shyǵaryla bastaǵan jetinshi radıofarmatsevtıkalyq ónim bolyp otyr.
Jalpy, QR PІB Medıtsınalyq ortalyq aýrýhanasynyń ıAdrolyq medıtsına ortalyǵy 10 radıofarmpreparatty óndiredi: onyń 7-eýi – tsıklotrondyq (18F-FDG, 18F-NaF, 11C-Met, 18F-DOPA, 18F-FLT, 18F-FET, 18F-PSMA) jáne 3-eýi – generatorlyq (68Ga-PSMA, 68Ga-DOTA, 68Ga-FAPI).
Aıta keteıik, Almatyda sút bezi obyryna qarsy preparattar óndiriledi.