Mindetimizdi talapqa saı atqarýǵa tyrysamyz – qyzylordalyq polıtsııa ınspektory
Ýchaskelik polıtsııa ınspektory qoǵamnyń tynyshtyǵy men halyqtyń qaýipsizdigi úshin jaýapty mindet atqarady. Mundaı qarbalas tirshilik polıtsııa qyzmetkerine Jańa jyl sekildi mereke kúnderinde arta túsedi.
Kazinform tilshisi olardyń jyl aýysar tustaǵy bir kúndik jumysyna zer salyp kórgen edi. Keıipkerimiz - Qyzylorda qalalyq Polıtsııa basqarmasynyń ýchaskelik polıtsııa ınspektory Dostybaev Mırambek Kalııadınuly.
- Aldymen mereke kúnderi polıtsııa qyzmetkerleri qalaı jumys isteıdi ? Sol týraly aıta ketseńiz...
- Bizdiń qyzmetimiz mezgilge baǵynbaıdy. Júktelgen jaýapkershilikti sezinemiz. Tıisinshe abyroımen atqarýǵa tyrysamyz. Nebir syndarly sátter ótedi. Qıyn da kúrdeli kezeńder kezdesedi. Qoǵamdyq tynyshtyqty saqtaýǵa kúsh salamyz. Árıne, bul Jańa jyl sekildi mereke qarsańynda eki esege artady desek te bolady. Jyldaǵydaı bıyl da jumysty kúsheıtilgen rejımde atqaryp jatyrmyz. Búgin osy maqsatta polıtsııa qyzmetkerleri qyzmet jasaýda.
- Ádette, mereke kúnderinde tártip saqshylary kúsheıtilgen rejımde jumys isteıtini belgili. Bul ýaqytta qandaı oqıǵalary tirkelip jatady ?
- Adam bolǵannan keıin olardyń minezi de san túrli. Mereke kúnderinde ishkilikke boı aldyryp, otbasynda daý shyǵaratyn adamdar da bar. Kóshede turǵyndardyń mazasyn alatyndar az emes. Sondaı-aq, ózge de quqyq buzýshylyqtar tirkeledi. Bizdiń mindetimiz - túrli oqıǵalardyń aldyn alý, qaýipsizdikti saqtaý. Bul - kúnbe-kún kezdesetin jaǵdaı. Árbir sátte óz mindetimizdi joǵary deńgeıde atqarýǵa tyrysamyz.
- Ýchaskelik ınspektordyń mindeti qandaı ? Qyzmet barysynda qandaı qıyndyqtar kezdesedi ?
- Ýchaskelik ınspektordyń negizgi mindeti - quqyq buzýshylyqtar men qylmystardyń aldyn-alý. Bul boıynsha profılaktıkalyq jumys júrgiziledi. Al qylmys tirkelgen jaǵdaıda tergeýshi nemese anyqtaýshymen birge jumys isteımiz. Sondaı-aq, basqa da qyzmetkerlerimen birlesip, ony ashý boıynsha belsendi jumys atqaramyz.
Men qyzmet atqaratyn ákimshilik aımaq -Tasbóget kentinde ornalasqan. Onda turǵyn sany - 4866 adam. Ákimshilik aımaǵynda 1 meıramhana, 2 kafe-bar, 17 dúken, 1 aýrýhana, 2 oqý orny, 1 sport kesheni, 1 medıtsınalyq ortalyq, 2 balabaqsha ornalasqan. Jyl basynan 103 habarlama kelip túsip, barlyǵyna tıisti zańdy sheshim qabyldanǵan.
- Jumys barysynda turǵyndarmen qalaı qarym-qatynas jasaısyz ?
- Ýchaskedegi turǵyndar óte qarapaıym, kóbine pozıtıvti, janashyr, túsinistikpen qaraıdy jáne jıi kómektesedi. Kóbinese bizge ýchaske boıynsha turmystyq, otbasylyq janjaldar, kórshilerge shaǵymdanýshylar nemese basqa da tártip buzýshylyqpen azamattar habarlasady.
Keıde neǵurlym aýyr quqyq buzýshylyqpen kúresýge týra keledi. Men adamdarmen sóılesip, jumysty júıeli júrgizýge tyrysamyn. Óz qyzmetimniń ereksheligi boıynsha maskúnemder, psıhıkalyq aýrýlary bar adamdarmen jumys isteımiz Profılaktıkalyq esepte turǵan adamdar bar.
Bıyl jyl basynan beri bizde 35 azamat profılaktıkalyq esepte tur. Olardyń árqaısysymen qarym-qatynas tásilin tańdaý mańyzdy. Sondyqtan adam odan ne qalaıtynyn, ony durys jolǵa baǵyttaýǵa múmkindik bar ekenin túsinýi kerek. Nátıjeli jumys bolý úshin eń aldymen aıanbaı qyzmet etý kerek.
- 1984 jyly 1 qańtarda Qazaly aýdany, Bekarystan bı aýylynda dúnıege kelgenmin. 2008 jyldyń qańtar aıynan beri Іshki ister organdarynda qyzmet atqaryp kelemin. Otbasylymyn. Jubaıym Gúlfaırýs Bolatqyzymen 2008 jyly shańyraq kóterdim. Qazir Qaýsar jáne Shuǵyla degen qyzym, Nurıslam men Nurıman degen eki ulym bar.
- Áńgimeńizge raqmet.
